Dehradun, Nohprah:
Ka Uttarakhand ka dang pynkhreh ban pyntreikam ïa ka Uniform Civil Code (UCC) hapoh u Kyllalyngkot 2025, kaba long ka sienjam kaba kongsan ha ka jingpynkylla ïa ka aiñ hapoh ka jylla.
La ïathuh ba ka jingpynkhreh ka la dep, bad la khmih lynti ba kan don ka jingpynbna paidbah hajan ka Makar Sankranti ha ka 14 tarik u Kyllalyngkot. Shisien ba la pynlong aiñ ïa ka, ka Uttarakhand kan long ka jylla kaba nyng-kong eh ha India ban pyntreikam ïa ka UCC naduh ba ka ri ka la ïoh ïa ka jinglaitluid.
Ha ka jingïalang jong ka Uttarakhand Investment and Infrastructure Development Board (UIIDB) ha Secretariat ha ka sngi Balang, u Myntri Rangbah ka jylla u Pushkar Singh Dhami u la pynpaw biang ïa ka jingkular jong ka sorkar jong u ha kaba ïadei bad ka UCC.
U la pynpaw, “Ka sorkar jylla ka la pyndep ïa ka kamram jong ka katkum ka jingkular jong ngi ban pyntreikam ïa ka UCC. Hadien ba la thaw ïa ka sorkar thymmai ha u bnai Lber 2022, la rai ha ka jingïalang jong ka kynhun myntri kaba nyng-kong eh ban thaw ïa ka komiti ba kyrpang na ka bynta ban pyntreikam ïa ka UCC ha ka jylla.”
Kum shi bynta jong kane ka jingthmu, la thaw ïa ka komiti ki riew shemphang kaba don san ngut dkhot hapoh ka jingpynïaid jong u Ranjana Prakash Desai Justice Supreme Court ba la shongthait.
Katkum ka jingtip ba la ïoh da ka TNIE na ki tyllong khubor kiba lah ban shaniah, ka jingai jinghikai ïa ki ophisar na ka bynta ban pyntreikam ïa ka Uniform Civil Code ha ka jylla ruh ka la don ha ka kyrdan ba khatduh.
U Myntri Rangbah ka jylla u Pushkar Singh Dhami u la pyntip ba ïa ka Uniform Civil Code Bill 2024 la mynjur da ka ïingdorbar jylla ha ka 7 tarik, Rymphang, katkum ka kaiphot jong ka komiti. “Hadien ba la ïoh ïa ka jingmynjur jong ka President, la pynmih ïa ka jingpynbna na ka bynta ka UCC ha ka 12 tarik u Lber,” u la ong.
Ha ryngkat bad kane ka jingkylla, la pynkhreh ruh ïa ki kyndon na ka bynta ka Uniform Civil Code, Uttarakhand 2024 Act.
“Ka Uttarakhand mynta ka la pynkhreh pura ban pyntreikam ïa ka Uniform Civil Code ka ban sdang naduh u bnai Kyllalyngkot” la pynthikna u Dhami.
U Dhami u la bthah ïa ki heh sorkar ban pynthikna ïa ka jinghikai kaba biang ïa ki briew ban pyntreikam ïa ki kyndon jong ka Code bad ban lum ïa baroh ki jingdonkam. “Nalor kata, ngi dei ban pynneh katba lah ïa ki jingshakri Online katba ngi dang pyrkhat ïa ka jingsuk jong ki paidbah,” la bynrap biang u Dhami.
U Myntri Rangbah ka jylla Pushkar Singh Dhami u la pynpaw, “Ha ka jingïohi ïa ka jingsuk jong ki paidbah ba bun, la shna ïa ka Portal bad ka Mobile app na ka bynta ban pyntreikam ïa ka Uniform Civil Code. Kane kan ai ïa baroh ki lad ki lynti kiba ïadei bad ka jingpynrung kyrteng, ka jingujor, bad kiwei kiwei lyngba ka Online.”
La thaw ïa ka Sub-Committee kaba hynriew ngut ki dkhot ba la khlieh da u Chief Secretary barim u Shatrughna Singh tang hadien ba la mynjur ïa ka aiñ halor ka UCC ha ka ïingdorbar ha u bnai Rymphang mynta u snem ban thaw ïa ki kyndon ban pyntreikam ïa ka.
Ka sub-committee kaba la thaw ban pynkhreh ïa ka dur jong ki kyndon ka la pynlong 43 tylli ki jingïalang ban shna ïa kajuh, u la ong.
U Chairman Singh u la ong, “Ka jingpyntreikam ïa ka Uniform Civil Code kan pynjan ïa ka jylla Uttarakhand ban buh ïa ki aiñ shimet kiba ïaryngkat na ka bynta baroh ki nongshong shnong, khlem da kheiñ ïa ka niam ne ka jaitbynriew jong ki, ha kaba ïa dei bad ka jingshongkha, ka jingpynïakhlad, ka jinghiar pateng, bad ka jingshim khun.
Hynrei, ki riewlum jong ka jylla ki la shah kyntait na kane ka aiñ.”
