New Delhi, Nohprah:
U Rahul Gandhi, uba long u nongïalam jong ka Congress, u la shah pynngat ha ki kyndon aiñ halor ka jingkynnoh ba u la pynmynsaw ïa ki ar ngut ki MP jong ka Bharatiya Janata Party (BJP) ha ka jingïakajia ha ka Parliament Complex ha ka Sngi Palei.
Kine ar ngut ki MP kiba kynthup ïa u Pratap Sarangi bad u Mukesh Rajput, ki la mynsaw na ka khlieh, ha ka por ba la don ka jingïakhih na ka liang pyrshah, kiba don shabar jong ka Parliament.
Baroh ar ngut kine ki nongïalam ha kaba uwei u dei ba la 69 snem ka rta, ki dang don mynta ha ka jaka ai jingsumar.
U Gandhi u la shah pynngat hapoh ki kyndon bapher bapher jong ka Bharatiya Nyaya Samhita ba kynthup ïa ki jingshah kynnoh ba u la pynmynsaw jur da ka mon jong u, ka jingleh ban buh jingma ïa ka jingim ne ka jingshngaiñ jong kiwei, ka jingpyndonkam bakla ïa ka bor ha ki kam sniew, ka jingpyntieng pynsmiej, bad ka jingthmu lang ban leh ïa ka kam sniew.
Ïa kane ka jingujor la mudui kham ha shwa ha kane ka sngi da u Anurag Thakur, uba ong u Myntri barim jong ka sorkar pdeng uba long ruh u MP jong ka seng BJP, bad ki MP kiba kynthup ïa u Bansuri Swaraj bad u Hemang Joshi, kiba nalor kiwei ki kam, ki la kynnoh ba u Gandhi u thmu ban pynïap briew.
Haba kren ha ka jingïalang bad ki nongthoh khubor ha ka janmiet, u Gandhi u la ong ba ka BJP ka la thaw ïa ka jingkulmar ha Parliament Complex ban khanglad ïa ki rukom kren jong u Myntri ka tnat ki kam pohïing ka sorkar kmie u Amit Shah halor u nongshna Riti synshar ka ri India u BR Ambedkar kaba la pynmih ïa ka jingïakynad kaba jur bha hapdeng ka liang pyrshah bad ka liang synshar.
Ha ka jingjur jong ka jingïakynad hapdeng ka BJP bad ka Congress halor ka jingkynthoh jong u Shah ïa u Ambedkar, arngut ki MP jong ka seng kaba bat ïa ka jingsynshar ki la shah sumar ha hospital namar ka jingmynsaw hadien ba la kynnoh ba u Rahul Gandhi u la wanrah ïa ka jingïakhih ha Parliament ha ka sngi Palei, la ong ka tyllong khubor.
Ka liang pyrshah ka la pynjur ïa ka jingïakhih jong ka kham hashwa ha ka jaka jong ka Ïingdorbar ha kaba wat ki nongthaw aiñ ki la kiew sha u pud ka ‘Makar Dwar’ ha ka kam kaba phylla jong ki kam saiñ hima sima.
Ha ka jingthmu ban pynshai ïa ka jinglong jong ka seng halor ka jingïakynad ha Parliament Complex ha ka sngi Palei, u Rahul Gandhi u la kren sha ki lad pathai khubor da ka kopi jong ka Riti Synshar ba la buh hakhmat jong u.
U la ong ba ka BJP ka la pyrshang ban pynthut ïa ka dorbar halor ki mat naduh ba la sdang ka dorbar ha Parliament. Ka seng Congress ka ju pynskhem ba ka rukom pyrkhat jong ka seng kaba bat ïa ka jingsynshar ka long kaba “pyrshah ïa ka Riti synshar bad pyrshah ïa u Ambedkar” bad ka kwah ban pyndam noh ïa ka jingkynmaw bad ka jingnoh synïiang jong u Ambedkar, la ong u Gandhi da kaba ther ïa ka seng BJP.
“U Myntri ka tnat ki kam pohïing u la pynpaw pyrthei ïa kane ka rukom pyrkhat (da ki jingkren jong u). Ngi la khot ban panmap bad ban iehnohkam, ha kaba na kane ka jingdawa kam shym la don jingkylla ei ei. Hynnin ka sngi, ki la sdang sa kawei pat ka jingpynthut. Ki MP jong ka liang pyrshah ki dang leit sha Parliament House na u mot jong u Ambdekar ji bad ki MP jong ka BJP ki dang ki ïeng hajan ki markyndon ryngkat bad ki dieng ha ki kti, ki la khang ban ai jingbit ïa ngi ban rung,” u la ong.
“Ka jingshisha ka long ba u (Shah) u la pynjah burom ïa u Ambedkar. U Myntri ka tnat ki kam poh ïing u dei ban pan map bad ban iehnoh ïa ka kam,” u la bynrap.
U President ka seng Congress, u Mallikarjun Kharge, uba la ai jingkren ha kane ka jingïalang bad ki nongthoh khubor, u la ong ba ka seng ka pynrem jur ïa ka jingkren jong u Shah pyrshah ïa u Ambedkar bad ïa ka rukom pyrkhat kaba ki pyni.
“U la kyntait ban pdiang ba u la leh ïa kano kano ka kam kaba bakla. Ngi la dawa ïa ka jingiehnohkam jong u bad, lada um lah, ïa u Myntri Rangbahduh ka ri u Narendra Modi la dei ban weng kam ïa u. Ngi la sngewthuh ba ym don kawei ruh na kine kiei kiei ka ban long kam, kumta ki nongïalam jong ka seng jong ngi, kynthup ïa u Rahul Gandhi bad ka Priyanka Gandhi, ki la pyrshah hynrei ka BJP ka pyrshang ban pynphai kylla ïa katei ka mat,” la ong u Kharge.
