Bengaluru, Nohprah:
U nongïalam ka BJP na Karnataka, u CT Ravi – uba la shah kem namar ka jingkynnoh ba u la kren pynjah burom ïa kawei ka kynthei nongthaw aiñ jong ka seng Congress ha ka kynhun Myntri jong u Myntri Rangbah ka jylla u Siddaramaiah – u la shah pyllait jamin shipor ha ka janmiet jong ka sngi Thohdieng. “Pyllait noh mardor ïa u… ha kano kano ka jaka ba u don,” la ong ka High Court, da kaba kdew ba ym shym la ai jingtip ne ai shithi maham ïa u Ravi shwa ban kem ïa u.
Ka hukum ka ong ba ki pulit ki la dei ban leh kumta shwa ban tohkit bad set ïa u halor ka jingujor ba la mudui da ka Myntri ba dei khmih jong ka Women and Child Development ka Lakshmi Hebbalkar.
“… la buh da ka jingmudui bymhok pyrshah ïa nga bad ki (ka Congress) ki la leh ïa nga kum u nong-leh kam sniew. Mynta to ai ba kin bishar bniah (halor) kaei kaba ki la leh. Kane ka dei ka jingjop na ka bynta ka jingshisha… ka hukum ka long kaba shai ba baroh ngi dei ban bud ïa ka aiñ. Ym shym la don kano kano ka jingpynshisha (hynrei watla katta ruh) la kem ïa nga,” la ong u Mr Ravi.”Ngam shym la leh bha… Ngam shym la bam bha hynnin ka miet bad mynta ka step ruh,” la ong u Ravi ha ka jingïakren bad ki nongthoh khubor.
U Ravi u la shahkem hadien ka jingujor jong ka Hebbalkar – ba u la pyndonkam da ki ktien kiba pynpoh ha ïingdorbar; la mudui halor ka jingthombor bad pyndonkam ïa ki dak ki shin kiba pynjah burom kiba long kum ka jingthombor beiñ hapoh ka aiñ bathymmai pyrshah ïa ki kam beaiñ, ka Bharatiya Nyay Sanhita.
Katkum ka jingong jong ka Hebbalkar, kaba la ïashim bynta ha ka jingïakhih pyrshah ïa ka jingkren jong u Myntri ka tnat ki kam pohïing ka sorkar kmie, u Amit Shah, ba ka ong ” U Ambedkar u dei ka Fashion”, ka la ong ba ka dang “shong sngap jar” ha ka por ba u Ravi, u la khot ïa u MP ka seng Congress, u Rahul Gandhi, kum u nongdih drok.
“Ha ka jubab nga la kylli, ‘Wat ma phi ruh phi la shah takhuh… hato kata ka pynlong ïa phi kum u nongpynïap briew?’,” ka la ong, da kaba kynnoh ba ka jubab ka don ïa ka ktien kaba pynjah burom.
