Sanaa, Nohprah
U Director General jong ka World Health Organization (WHO) u Tedros Adhanom Ghebrey esus u la lait thaw na ka jingbthei bom ka liengsuiñ ha ka kad liengsuiñ Sanaa International Airport ha Yemen ha ka sngi Palei, kaba la wanrah ïa ka jingïap jong ar ngut ki briew.
U Dr Tedros ryngkat ki paralok jong u na ka United Nations (UN) bad ka WHO, ki dang thmu ban kiew liengsuiñ ha kaba katei ka jingshah thombor ka la jia, ha kaba uwei na ki nongtrei katei ka liengsuiñ, u la mynsaw.
Ha ka jingthoh ha ka rynsan X, u heh jong ka WHO u Ghebreyesus u la ong, “Ka thong jong ngi ban ïakren ban pyllait ïa ki nongtrei jong ka @UN kiba shah set bad ban bishar bniah ïa ka koit ka khiah bad ka jinglong jingman ha #Yemen ka la kut mynta ka sngi. Ngi dang ïai bteng ban khot ban pyllait noh mardor ïa ki nongshah set. Kumba ngi la jan kiew ha ka liengsuiñ jong ngi na Sana’a, kumba ar kynta ha shuwa, ka kad liengsuiñ ka la shah ther bom na suiñ. Uwei na ki nongtrei jong ka liengsuiñ jong ngi u la mynsaw. Ym duna ïa ka ar ngut ki briew ki la ïap ha ka kad liengsuiñ. Ka tower kaba pynïaid ïa ka jingleit jingwan jong ki liengsuiñkaba tang katto katne meter na ka jaka ba ngi don bad ka lynti ïaid liengsuiñ ka la shah pynjulor. Kan donkam ban ap ïa ka jingjulor jong ka kad liengsuin ban maramot shwa ba ngin mih noh. Ma nga bad ki paralok jong nga na ka UN bad @WHO ngi la shngaiñ. Ka jingsngewlem jong ngi sha ki longïing kiba la duh noh ïa ki baieit bathoin kiba la duh la ka jong ka jingim ha katei ka jingshah thombor.”
U Secretary-General jong ka UN, u Antonio Guterres, u la pynrem ïa katei ka jingshah thombor bad u la pynpaw ruh ba dei ban burom ïa ka aiñ jong ka pyrthei, bad da kaba ban jur ba ki riew paidbah bad ki nongtrei mon sngewbha na ka bynta ki paidbah kim dei satia ban shah thombor.
Ha ka jingthoh ha ka rynsan X, u Guterres u la pynpaw ka jingsngewsih halor ka jingïakynad kaba dang shen hapdeng ka Yemen bad ka Israel, bad u la khot ïa ki jingthombor liengsuiñ ha ka kad liengsuiñ jong ka Sanaa, ki kad liengsuiñ jong ka Red Sea bad ki jaka pynmih bording ha Yemen “kiba sngew shyrkhei”.
Katkum ka jingong u Heh jong ka UN, la ïathuh ba ki jingshah thombor ha ki liengsuiñ ki la pynlong ïa kiba bun ki briew kiba la ïap kynthup ym duna ïa ka lai ngut kiba la ïap bad da ki phew ngut kiba la mynsaw. U la pynkynmaw biang ïa ka jingkhot ïa baroh ki liang ban sangeh noh ïa ki kam shipai bad ban pyndonkam ïa ka jingpynïaid.
Katkum ka jingong jong ki shipai Israel Defence Force (IDF), ki shipai suiñ jong ka Israel ki la pynlong ïa ki jinghiar thma ïa ki jaka shipai kiba dei jong ki Houthi ha ki rud duriaw ba shathaiñ Sepngi bad hapoh ka ri Yemen. Ïa kine ki jingshah thombor la pynlong halor ki jingtei shipai jong ka Houthi kiba la pyndonkam na ka bynta ki kam shipai jong ka. Ki jaka ba la thmu ki kynthup ïa ka Sana’a International Airport bad ki Hezyaz bad Ras Kanatib power station kynthup ka Al-Hudaydah, Salif bad Ras Kanatib ports ha ki rud duriaw ba sha thaiñ Sepngi.
