Shillong, Nohprah 29
Ka Services kaba dei lahduh jong ka aïom ba la dep ka la shah rem noh ha ka West Bengal da 4-2 kol ha ka jingïakhun semi final jong ka Senior Men’s National Football Cham-pionship na ka bynta ka Santosh Trophy 2024-25 kaba la long ha ka Sngi U Blei ha Gachibowli Stadium kaba ha Hyderabad.
Kane ka la wan urlong lyngba u Robi Hansda (45+2 & 90+6) uba la thep ar kol ryngkat ka jingïarap lang da u Manotos Maji (16) bad u Naro Hari Shrestha (45+4), katba ka Services ka la lah ban pynphai kylla ar kol lyngba u Bikash Thapa (53) bad kawei la ïarap pynthep da u rangïalehkai ka liang pyrshah u Juwel Ahmed Mazumder (74).
Kane ka jingjop ka la pynlong ïa ka West Bengal ban jam sha ka final ha ka sien kaba 47 bad kaba la bat ruh ïa ka rekod kaba 32 sien ban ïoh jingjop ha kane ka lympung.
Kumba ka paw u Hansda u dei u ‘rang thep kol ba kynsai ha kane ka lympung ha kaba u la lah ban thep haduh 11 kol bad u la ïohpdiang ruh ïa ka khusnam Player of the Match.
Lah ban kdew ba ka jingïaid lynti ka Megha-laya ha ka Santosh Trophy 2024-25 ka la poi sha kaba kut hadien ba ka la shah rem ha ka Services da 2-1 kol ha ka quarter final kaba la long ha ka sngi Thohdieng.
Ha katei ka jingïakhun ka Services ka la ïoh ban thep kol lyngba u Thingnam Bidhyasagar Singh (33) bad u Rahul Ramakrishnan (46) na ka daw ka jingbakla bad bym lah kyrda ki rangïalehkai shadien ka Meghalaya. Hynrei shwa ban wai u Overkindness L Mawnai (86) u la lah ban pynphai kylla shi kol shwa ban shah rem.
