New Delhi, K’lyngkot:
U Nitin Gadkari, Myntri ka sorkar kmie uba dei khmih ïa ka tnat Road Transport and Highways, ha kine ki khyndiat sngi ba la leit, u la pynbna ïa ki projek surok kiba la kot sha ka T. 12,500 klur ban weng ïa ka jingjaboh bad ka jingkhapngiah jong ki kali ha ka nongbah jong ka ri.
Nalor kata, u la mynjur ïa ka pisa kaba T.1,200 klur na ka Central Road and Infrastructure Fund (CRIF) na ka bynta ka nongbah Delhi.
U Gadkari u la pynbna ïa kane shisngi hadien ba ki hynriew ngut ki nongthaw aiñ na Delhi ki la ïakynduh ïa u, ha kaba ki la pan ïa ka jingmynjur jong ka sorkar kmie na ka bynta ki projek kiba kynthup ka jingshna ïa ka surok kaba pynïasoh ïa ka surok Urban Extension Road-II bad ka surok Delhi-Katra Expressway, kaba ailad ïa ki kali ban ïaid na Delhi-Mumbai Expressway sha ka kad liengsuiñ jong ka Indira Gandhi bad kumjuh ruh shawei pat.
Kiwei pat ki projek ki kynthup ïa ka surok kaba pynïasoh ïa ka UER-II bad ka surok Delhi-Dehradun Expressway hajan ka Tronica City, ka thliew kaba 5 km kaba pynïasoh ïa ka Shiv Murti ha ka surok bah Delhi-Gurgaon sha ka surok Nelson Mandela, bad ka jingpynïasoh ïa ka surok Delhi-Dehradun Expressway bad ka Noida.
“Baroh kine ki projek kin pynlah shuh shuh ïa ki kali na kiwei ki jylla ban lait na Delhi haba ïaid hapdeng ki jylla ha baroh ki liang,” ong u Gadkari.
U Gadkari u la buh jingthoh ruh ha ka rynsan X, “Ka jingpynbiang ïa ka jingpynïasoh na UER-II sha ka surok Delhi-Katra Expressway lyngba ka KMPE kan ai lad ban rung beit ïa ki kali kiba wan na Jammu & Kashmir bad Punjab sha ka Indira Gandhi International Airport bad sha Delhi-Mumbai Expressway. Ka jingpynïasoh beit na UER-II kaba don hajan Alipur sha ka surok Delhi-Dehradun Expressway kaba don hajan ka nongbah Tronica kan pynsuk ïa ki kali kiba leit sha Dehradun na Haryana bad Rajasthan.”
“Ki kali kiba wan na Dehradun kin don ka lynti kaba pher ban leit sha Indira Gandhi International Airport lyngba ka UER-II bad ka Dwarka Expressway. Yn pynduna ïa ka por leit jing-leit na ka shi kynta shiteng sha ka 45 minit,” u la bynrap.
Ha kajuh ka por, u Myntri Rangbahduh u Narendra Modi ha ka sngi Thohdieng u la plie bad buh ïa ki mawnongrim na ka bynta hynriew tylli ki projek pynroi ba kongsan ha kylleng ka nongbah Delhi, kiba kynthup ïa ki ïing ki sem, ka pule puthi, bad ki jaka khaïi.
