Washington, K’lyngkot:
Katkum ki kaiphod ba la ioh lum da ki heh ka tnat wad bniah ha kane ka por, la shem ba u nongthombor jong ka jingjia ha New Orleans, u Shamsud-Din Jabbar, u la leh hi marwei wat la ki don ki dak kiba pyni ba utei u runar u ju ioh mynsiem bad ai jingkyrshan ruh ia ka kynhun lehnoh ISIS.
Ha katei ka jingjia, la don haduh 14 ngut kiba la khlad bad 35 ngut kiwei pat ki dei kiba la mynsaw hadien ba u Jabbar uba niah ia ka kali u la leit tynrah sha ki paidbah ha Bourbon Street ha ka step jong ka Sngi Balang.
Ka FBI ka dang pyniaid ruh ia ka jingtohkit bniah haba iadei bad katei ka jingjia kaba long ruh kawei na ki kam thombor jong ki lehnoh. U Jabbar, u la don 42 snem ka rta bad u dei ruh u shipai barim jong ka US.
U Biden ha ka Sngi Thohdieng, u la ong ba ka FBI ka la phah jingtip sha u bad kumba ka long mynta, yn shym la ioh jingtip eiei ban don kiwei pat kiba donkti ha katei ka jingjia thombor. Ki la pynshisha ba u nongthombor u dei hi ujuh u briew uba la leit pyndait ïa ki tiar pynbthei ha ki ar tylli ki jaka ba marjan ha ka French Quarter tang katto katne kynta shwa ba un tynrah ïa ki paidbah da ka kali jong u.
Shuh shuh ruh la ong ba utei u nongthombor u la pynmih katto katne ki durkhih tang katto katne shwa ban thombor bad katei ka durkhih jong u, ka pyni ba u ai jingkyrshan tyngeh ia ka ISIS. Ki bor pynjari aiñ jong ka sorkar pdeng bad ki tnat wad bniah ki dang tohkit bniah ïa kino kino ki jingïadei kiba nabar ri ne hapoh ka ri kiba lah ban iadon kti lang ha katei ka kam thombor.
U Biden, u la ioh ruh ban leit kynduh ia ki kynhun iada ri jong u tang khyndiat por hi hadien ba u la wan phai na Camp David, ha ka janmiet jong ka Sngi Palei. U la ïathuh ha ki nongthoh khubor ba ki dang bteng ruh ban toh-kit la ka don ne em ka jingïadei hapdeng ka jingshah thombor ha New Orleans bad ka jingbthei bom ha Las Vegas.
