Cape Verde, Nailur:
Ha kane ka jingjia, la iathuh ba 25 ngut ki la duh ei noh ïa ka jingim jongki na katei ka jingleit hap bakla jong kawei ka bos sha ka riat jong ka dew lynnong Fogo bad la ong ruh ba napdeng jong kitei kiba khlad baroh, la kynthup lang ïa ki khyllung- khynnah kiba don lang hapoh jong katei ka bos.
Hynrei nalor jong kitei kiba khlad, don ruh sa katto- katne ngut kiwei pat kiba la ngat lang bad mynsaw ha katei ka jingjia ha ka Sngi Saitjaiñ, katto katne na ki ki la mynsaw jur bha, ong u heh jong ka tnat ïada paidbah na ka bynta ka nongbah Sao Filipe, u Jose Canuto, ha ki nongthoh khubor.
Watla kum kine ki jingjia kim ju jia ha ki ri lum jong ka Africa Sepngi, ha kaba ki surok ki long kiba bha ha ka jinglong kyllum. Hynrei kane ka jingjia ka la pyn lyngngoh ïa ki bor pyniaid jong katei ka nongbah ha kane ka sien bad la suba ba imat la dei u nongñiah jong katei ka bos uba la pynher bad um lah shuh ban tehlakam ïa ka jingstet jong katei ka bos.
U Canuto bad kiwei kiwei ki bor synshar shnong, ki iathuh ba katei ka bos, kaba kit ïa 32 ngut ki nongleit nongwan, ka la kylla na surok bad ka la leit hap bakla shapoh ka riat kaba jylliew, katba ka dang thmu ban leit phai sha Sao Filipe, hadien ka jingleit jngohkai pyrthei sha ka shnong Cha das Caldeiras, kaba don hapoh ka dew lynnong Pico do Fogo.
Kitei kiba iap ki kynthup lang ruh ïa u nongñiah jong katei ka bos, uba pynlong ïa ka jingleit jngohkai sha katei ka jaka kaba kyrpang man la u snem kum ka jingai sngewbha ïa ki khynnah skul kiba u la niah sha skul ha ka por term.
Ki nongtrei ba kyrkieh ki la trei shi miet ban pyllait im ïa ki nongshah pynjulor kiba la sahkut ha ki thliew, kiba la sangeh ha ka them maw kaba eh ban poi.
Ki bor pyniaid ki la iathuh ba la dep ban tep bad pyndep ïa ka jingleh burom khatduh ïa ki 7 ngut kiba khlad ha ka Sngi U Blei. Katba, ïa kiba sah pat la pynbeit ban tep noh ha ka sngi kaba bud.
