Jerusalem, Nailur:
U Myntri Rangbah duh jong ka Israel, u Benjamin Netanyahu, u la hukum ïa ki bor pyniaid ban pynkynriah noh ïa ki katto- katne ki jaka sah ha West Bank, kiba la shah knieh, kiba la kheiñ ba ki long be-aiñ katkum ka aiñ jong ka Israel, ong U Bezalel Smotrich, u Myntri ka tnat pla tyngka jong ka Israel, ha ka Sngi U Blei.
“Katkum ka jingtip jong nga, u Netanyahu u la ai ka jingbthah ban pynkynriah” ïa ki katto katne ki jaka shong jaka sah, ong u Smotrich bad bynrap ba um mynjur satia ïa katei ka sienjam.
Katba baroh ki jaka sah jong ki Israel ha West Bank la kheiñ ba ki long be-aiñ katkum ka aiñ jong ka pyrthei, katto katne kiba la seng khlem ka jingmynjur jong ka sorkar — bunsien ki kynthup tang ïa ki katto katne ki ïing ba la shna lypa – la kheiñ ruh ba ki long be-aiñ da ka Israel.
Katto katne ki lad pathai khubor jong ka Israel, ki la iathuh ruh ha ka Sngi U Blei, ba u Netanyahu, ula pynmih ïa katei ka hukum, ha kaba ka Ynet, kaba heh tam jong ka Israel, ka tnat pathai khubor, ka ong ba katei ka dei ka jingmih na ka jingpynbor jong ka US.
Ha kaba kut jong u bnai August, u Netanyahu u la kular ban bteng ban seng ïa ki jaka shong jaka sah ha West Bank wat hapdeng ka jingkynthoh pyrshah jong ki ri ka pyrthei kaba nang jur.
Ka jingtei bad jingpynheh ïa ki jaka shong jaka sah jong ki Israel ha ki jaka jong ka Palestine ka la nang kiew shibun hapoh ka jingsynshar jong u.
Katkum ka jingong u Smotrich, ka jingpynkynriah ïa ki briew ka dei kaba iadei bad ki outpost ba la tei ha ki jaka kiba hap hapoh ka jingpeit jong ka Palestine bad khlem ka jingbit jong ki bor sorkar.
U nongïalam jong ka seng kaba sha ka liang ka diang tam, kaba kyrshan ban pynïasoh noh ïa ka West Bank baroh kawei, u Smotrich, u la pynpaw pyrthei ha ka Sngi U Blei, ba u la ïalam ïa ka “jingkylla” da kaba tei bad pynlong aiñ ïa ki “shnong, ki lyngkha, ki surok bad ki hajar tylli ki ïing” ha katei ka jaka, kaba la bat da ka Israel, naduh u snem 1967.
