New Delhi, Nailur:
U Myntri Rangbahduh ka India, u Narendra Modi, ha ka Sngi Thohdieng u la ai khublei kitbok kit rwiang ïa ka Myntri Rangbahduh jong ka ri Italy, ka Giorgia Meloni, halor ka jingiohbat jongka ïa ka nam Myntri Rangbahduh ba la shakri slem tam duh jong katei ka ri. Kumta ruh u Modi u la kitbok ïa ka ba kan nang shait- nang khlaiñ bad kan nang lah ban bteng ïa ki kam ki jam ha ryngkat u soh uba bha ha ki jingiaid lynti jongka nangne shakhmat.
U PM Modi, haba ai khublei halor kane ka jingleh jong ka Meloni, u la ïaroh ïa ka jingtrei shitom jong ka sorkar jong ka ha kaba pynkhlaiñ ïa ka jingïatreilang ba kyrpang hapdeng kine ki ar tylli ki jaitbynriew. U la pynpaw ïa ka jinglong ba kloi ban bteng ïa ka jingiatreilang kaba jan ban tei ïa ka lawei kaba roi na ka bynta ki paidbah jong ki ar tylli ki jaitbynriew.
Ha ka jingthoh kaba la thoh hapoh ka rynsan X, u PM Modi u la ong, “Nga ai khublei ïa ka paralok jong nga ka Myntri Rangbahduh Meloni kaba la long ka Myntri Rangbahduh kaba la shakri slem tam ha ka histori jong ka Italy hadien ka thma. Kane ka mawjam ka long ka jingpynpaw ïa ka jingshaniah bad jingshaniah jong ki paidbah Italy ha ka jinglong nongialam jong ka.”
“Ka jingïatreilang jong ka ka la long ruh ka atiar’ ban pynkhlaiñ ïa ka India-Italy Special Strategic Partnership bad nga khmih lynti ban bteng ïa ka jingïatreilang kaba jan jong ngi ban tei ïa ka lawei kaba roi na ka bynta ki paidbah jong ki ri jong ngi. Ka jingkitbok kitrwiang jong nga na ka bynta ka jingjop kaba khraw jong ka ha ki snem ban wan,” u la bynrap.
Kaba kham pawnam ka long ba ka sorkar ba la ialam da ka Giorgia Meloni ka la kylla long ka sorkar kaba la slem tam ha ka histori hadien ka thma jong ka Italy Republic, hadien ba ka la tam ïa ka por jong u PM barim u Silvio Berlusconi.
Ka Meloni, ka la shimti ïa ka kam kum ka Myntri Rangbahduh kynthei ba nyngkong eh jong ka Italy, ha ka 22 tarik u Risaw, 2022, bad ka sorkar jong ka, ha ka sngi Palei, ka la poi sha ka 1,413 sngi ha ka kam.
Kham mynshwa ha u bnai Kyllalyngkot, ka Meloni ka la ai khublei ïa u PM Modi uba la long u PM ba la jied slem tam ha ka ri India bad ka la pynpaw ruh ba ka long kaba kloi ban ïatreilang bad u ha kaba thaw ïa ki lad ki lynti kiba thymmai na ka bynta ki paidbah jong kine ki ar jaitbynriew.
