Kremlin, Nailur:
U Myntri kam bar ri jong ka Russia, ha ka jingiakren bad ki lad pathai khubor ha ka Sngi U Blei, u la ong ba ka Germany ka pan kwah ïa ka thma. Utei u heh ka Russia u la kren ïa kane hadien ba ka Germany ka la kynnoh ba dei ka Russia kaba leit thombor ïa ka Kad Liengsuiñ ha Leipzig.
Namar la ong ba ka sorkar Germany ka la kynnoh ïa ka Russia halor kane ka jingjia, da kaba ong ba ka Russia ka la phah hiar thma shwa ïa ki shlem treikam ba kongsan jong ka Germany na ka bynta ka jingpyrshang ban hiar thma jur hadien, kynthup ïa ka drone kaba la buh ïa ki tiar pynbthei ha ka kad liengsuiñ ba kongsan ha ka thaiñ mihngi jong ka Germany.
Ka Russia bad ka Germany, ki la khang ïa ki jaka lehniam jong kawei pa kawei ha kane ka taiew, ha kaba ki ri jong ka EU, ki la khot ïa ki nongmihkhmat jong ka Russia.
“Kane ka dei, ha ka jingïalang, ka jingsdang jong ka thma ba shisha. Ki la beh noh ïa ka tnat treikam jong ka Bonn. Ki dang khang ïa ka ïing jong ka Russia (ka jaka pynlong kolshor) ha Berlin. Nga kynmaw ba shwa ban sdang ka thma bah ba ar… Ki kwah thma biang,” ong u Myntri kam bar ri jong ka Russia, u Sergei Lavrov, ha u nongthoh khubor TV jong ka sorkar jylla.
U la kynnoh ïa ka Germany ba ka dei ka Nazi bad u la ong: “Ki nongialam jong ka Russia kin sa shim ïa ki jingpynkut kiba iadei.”
Shi bynta jong katei ka jingiakren la pynmih da ka Vesti TV channel jong ka Russia.
Ka Germany ka dei kawei na ki paralok ba kongsan jong ka Ukraine ha ka thma pyrshah ïa ka Russia.
U Lavrov, uba dei u myntri jong ka Russia, uba la bat slem tam, u la kren katba ka jinghiar thma jong ka Moscow — ka jingialeh kaba shyrkhei tam ha Europe naduh ka thma bah ba ar- ka la neh la palat saw snem shiteng.
U la kren ruh ha shwa ka elekshon parliament kaba la tehlakam bha ha Russia ha kaba kut jong une u bnai.
