Shillong, K’lyngkot 06
Ka MLFC ka la ïoh rah ïa ka nam lahduh jong ka lympung ïalehkai ba la tip kum ka Open to All New Year Bonanza Inter Club kaba la pynlong da ka Lawsohtun United Sports Social and Cultural Orga-nisation bad ban khung syndon ïa ka song pisa kaba long T.1.70 lak ryng-kat ka trophy.
Kane ka la wan urlong hadien ba ka la lah ban pynliem noh ïa ka Maybedashisha FC da 3-0 kol ha ka jingïakhun final kaba la long ha ka 31 tarik Nohprah 2024 ha madan Lawsohtun. Ka Maybeda-shisha kaba la shah rem ha ka final ka la khung T.80 hajar bad ka trophy.
Ha kane ka sngi pynhap pyrda ïa kane ka lympung, u MDC ka thaiñ, Bah Mitchel Wankhar u la ïadon lang kum u kongsan, katba u Bah N Lyngwa kum u symbud kongsan nalor kiwei kiwei kiba la shah khot sngewbha bad ki paidbah ka shnong Lawsohtun kiba la pyndap ïa ka madan.
U Bah Mitchel ha ka jingkren u la ong ba kum shnong ka la kiew bha ha ka jingïalehkai phutbol bad bynrap ruh ba kum ki samla ki donkam ban ïashim bynta ha ki jing-ïakop ban sei ïa la ki sap ki phong ïalehkai ki jong ki. U la ong ruh ba u dap da ka jingsngew sarong ba ha kane ka madan ha Lawsohtun, ym dei shuh tang ki rangïalehkai na ki club shnong kiba la wan ïuh kjat hynrei wat ki rangïalehkai na ki lympung baheh ki la wan ïuhkjat.
Ha kane ka sngi nalor katei ka final, ki la don sa ar tylli kiwei pat ki final, ha kaba ha ka Veteran Cup la jop da ka MLP ïa ka Nakra FC. Ka MLP ka la khur T.30 hajar bad ka Nakra ka la ïoh T.10 hajar bad ha ka Women’s Football pat la jop da ka Lamare FC kaba la khung T.20 hajar ïa ka Seng Kynthei Lawsohtun kaba la ïoh T.10 hajar.
Haba phai sha ki khusnam shimet, ka nam ‘Man of the Match’ ha ka final la ïoh da u Aenam Jyrwa, ka nam Best Defender la ïoh da u Fedrick Wahlang, Best Midfielder da u Yammy Longvah, Top Scorer la ïoh da u Nelson Rymbai, Discipline Team sha ka MLP FT, Golden Gloves la ïoh da u Richard, Best Manager la ïoh da u Mayborn Rap-thap na ka Maybedashisha bad ka nam ‘Most Valuable Player’ la ïoh da u Shaibor Nongrum na ka Maybedashisha FC.
