Dibrugarh, Kyllalyngkot:
Saw ngut ki briew kiba leh mynleh kum ki dkhot jong ka seng ULFA(I) ki la shah kem ha ka por ba la pynlong ïa ka jingkhynra ha ka thaiñ Duliajan jong ka Dibrugarh distrik kaba don ha ka bynta ba shaphang Mihngi jong ka Assam.
Kitei ki briew kiba la shah kem ki dei ba la tip kyrteng kum u Bitupon Gogoi ba la tip ruh da ka kyrteng kum u Jayanta Asom, u Bharat Hazari, u Bolin Gogoi, bad u Binod Pahari.
“Kine ki briew ki la phah ïa ki shithi dawa pisa sha lai ngut ki nongkhaïi ha ka thaiñ Duliajan. Ngi la buh jingthoh ha kaba ïadei bad ka jingjia hapoh ka number 2/25 ha Duliajan Police Station bad la sdang ruh ïa ka jingtohkit. Kane ka la pynlong ïa ka jingjop na ka jingïoh ban kem ïa kine ki saw ngut ki nongleh kam sniew kiba pyndonkam bakla ïa ka kyrteng ULFA(I) na ka bynta ki kam dawa pisa,” ong u ASP(HQ) ka Dibrugarh u Nirmal Ghosh ha ki nongthoh khubor ha ka janmiet jong ka sngi Saitjaiñ.
“Ha kane ka jingkhynra, ngi la ïoh ban kurup kawei ka pistol 7.65, shi song ki kuli bym pat pyndonkam, 11 tylli ki Mobile Handset, 18 tylli ki Sim Card, kawei ka IED, kawei ka Battery, bad ka pisa kaba T.49,500 na ki kti jong ki. Kine ki briew ki dei kiba la tip kum ki nongleh kam sniew bad ki pyndonkam da ka kyrteng ULFA(I) ban leh ïa ki kam dawa pisa,” ong u Ghosh.
U Ghosh u la bynrap shuh shuh da kaba ong, “Ki la thmu ban pynbthei ïa u bom IED ha ka por ba rakhe ïa ka Republic Day ha Duliajan. Ka long kaba kongsan ban pynksan ba kim don jingïadei bad ka seng ULFA(I) kaba shisha. Hynrei ki dei ki nongleh kam sniew kiba pawnam bad la buh jingthoh bad jingmudui ha bun tylli ki mukotduma pyrshah ïa ki ha ki thanat bapher bapher kiba don ha kylleng ka jylla Assam.”
