Lucknow, Kyllalyngkot:
Ka kynhun seng ki nong-rep jong ka seng Congress, ka All India Kisan Congress, ka la shim ïa ka rai ban sdang ïa ka ‘Kisan-Mazdoor Samman Evam Nyay Yatra’ ha Uttar Pradesh, naduh ka 18 tarik, Kyllalyngkot.
Ka kyrwoh khubor ba la pynmih da ka tnad treikam jong ka Uttar Pradesh Congress Committee (UPCC) ka la kdew ba la pynlong ïa ka jingïalang hapoh ka jingïalam jong u heh nongïalam jong ka seng ha ka jylla u Ajay Rai ban ïakren ïa ki jingpynkhreh na ka bynta ka Yatra kaban sa wan.
Haba kren ha ka jingïalang, u Ajay Rai u la kynnoh ïa ka sorkar kmie bad Uttar Pradesh ba “ki khñiot ïa ki nongrep, ki nongbylla, ki nongtrei, ki kynthei nongrep, bad ki nongtrei kti arshah.”
“Ha ka jingïakhih jong ki nongrep, ka sorkar kmie ka la kular ban ai ka jingpynthikna katkum ka aiñ na ka bynta ka MSP (Minimum Support Price) na ka bynta baroh ki nongrep. Mynta ka sngi, ka sorkar ka dang sngap jar halor kane ka mat,” ong u Rai.
Haba kren ha kane ka jingïalang, u Akhilesh Shukla, uba long u National Vice President jong ka All India Kisan Congress, u la ong, “Ka Yatra kan sdang ha ka 18 tarik, Kyllalyngkot, 2025, na khappud Loni ha Ghaziabad. Haba bud ïa ka por ba la buh, yn pynlong ïa ka Yatra haman la ka distrik hapoh ka jingïalam jong ki nongpynïaid ba la jied bad ryngkat bad ka jingpynïaid na ki nongïalam jong ka ri bad ka jylla.”
Ha kane ka Yatra yn jied 300 ngut ki “Kisan Nyay Yodhas” (ki nongïaleh pyrshah ïa ka hok ha ki kam rep) na kawei pa kawei ka distrik. Shisien ba la kut ka Yatra, yn pynlong ïa ka jingïalang kaba kynthup ïa ki nongïashim bynta na baroh 75 tylli ki distrik, ha kaba 22,500 ngut ki Kisan Yodha kin leit ban ïashim bynta.
U Shukla u la ong shuh shuh, “Ha u snem ban wan, ngi thmu ban thaw 300 ngut ki Kisan Nyay Yodha haman la ki Assembly konstitwensi. Shuwa ka ilekshon Assembly jong u snem 2027, ngi thmu ban pynlong ïa ka jingïalang bah jong ki nongrep kaba don 1,20,900 ngut ki Kisan Yodha.”
Katkum ka kyrwoh, ban pynthikna ba ka Yatra kan long ha ka rukom kaba ïaid ryntih bad kaba don akor, la thung ïa ki National Coordinator na ka All India Kisan Congress ha ka Divisional Level.
Nalor kata, ki nongkitkam jong ka ri na kiwei pat ki jylla kin trei kum ki nongpynïaid ha ka kyrdan distrik, bad ïa ki heh jong ka Kisan Congress na Uttar Pradesh la bynshet ïa ki kam ban pynlong ïa ka ha ka kyrdan jong ka thaiñ, ka la bynrap.
