Shillong, K’lyngkot 07
Ka Result Combine XI ka la pynliem noh ïa ka Nangkyntiew CC da 5 wiket na ka bynta ban ïoh jingjop ha ka Third Division Cricket League 2024-25.
Ha kane ka jingïakhun, ka Nangkyntiew ka la kam trai ban tied nyngkong ha kaba ka la ïoh 132 run bad shah pynhap 7 wiket ha ki 17 over. U Edmund Sawian u la tied 42 run na ki 38 bol bad u Angelo Sawian u la ïoh 28 run na ki 24 bol. Katba u Dapbiang Kupar Nongkynrih u la shim 3 wiket bad 2 wiket da u Skhem Thongni.
Haba wan shimti ïa ka pali ba ar, ka Combine Xl ka la kynjoh sha ka thong da kaba ïoh 133 run bad shah pynhap 5 wiket ha ki 12.4 over. U Andreas Lyngdoh u la tied 44 run na ki 21 bol bad u Adrian Nongrum u la ïoh 29 run na ki 23 bol. Katba u Cassius Cley Dkhar u la shim 2 wiket badshi wiket da u Ïaineh Blah. Ïa ka nam Player of the Match la ïohpdiang da u Dapiang Kupar Nongkynrih.
Haba phai sha kawei pat ka jingïakhun ba ar, ka Solidarity Club ka la jop da 57 run ïa ka Laitkor CC. Ka Solidarity Club kaba la shimti ban tied nyngkong ka la ïoh 161 run bad shah pynhap 8 wiket ha ki 20 over. U Kamal Sharma u la tied 47 run na ki 34 bol bad u Ashmit Paul u la ïoh 31 run na ki 20 bol. Katba u Arbor Wankhar bad u Aleric Wanswet ki la shim mar 2 wiket.
Haba wan ban beh ïa ka thong, ka Laitkor ka la ïoh tang 104 run bad shah pynhap 6 wiket ha ki 20 over. U Osric Herbert Wanswet u la tied 32 run na ki 36 bol. Katba u Kamal Sharma u la shim 2 wiket bad shi wiket da u Subham Sharma. Ïa ka nam Player of the Match la ïohpdiang da u Kamal Sharma.
