Patna, Kyllalyngkot:
Hapdeng ki khubor ba la ïoh ïa ka jingpang Metapneumovirus ha ki bynta jong ka ri, ka bor pynïaid distrik jong ka Patna ha ka sngi Ba-ar ka la kyntu ïa ki briew ban bud ryntih ïa ki jingbthah ba la pynmih da ka sorkar kmie bad ka Sorkar Bihar, da kaba ong ba ym donkam ban don jingtieng ne jingsyier.
Ka kyrwoh ba la pynmih da ki bor synshar distrik ka ong, “Ki paidbah ki dei ban bud ryntih ïa ki jingbthah ha ka koit ka khiah ba la pynmih da ki bor ba dei peit khnang ban ïada na ka jingpang HMPV. U District Magistrate u Chandrashekhar Singh u la bthah ruh ïa u District Civil Surgeon ban pynthikna ba kan treikam bha ki hospital na ka bynta ban sumar hok ïa ki nongpang kiba don ka jingpang ring bad pynhiar mynsiem, kynthup ïa ka jingpang khlam ba ju jia ha ki aïom bad ka HMPV.”
“U DM u la ong da kaba shai ba ym donkam ïa ki briew ban tieng. Baroh ki jingpynkhreh la leh da ka bor pynïaid distrik katkum ki kyndon,” la ong ka khubor. Ka jingai jingmut ka la pynksan ïa ki lad jingïada, ka jingpynkhreh ha ki jaka sumar, bad ka jingpynsngewthuh paidbah ban weng ïa ki jingeh ka jingkiew ka jingma jong ka jingsaphriang ka jingpang ha ki bnai tlang.
U DM u la pynthikna ïa ki paidbah ba ki tnad ka koit ka khiah bad ki jaka peitngor ki long kiba husiar bad kiba kloi ban jubab kloi ïa kano kano ka jingeh ha ka koit ka khiah ha ka distrik.
Ka jingpang kaba ktah ïa ka jingring bad pynhiar mynsiem jong ka HMPV ka dang saphriang mynta ha ka pyrthei bad kum kiwei pat ki jingpang pynhiar mynsiem, ka kham paw ha ka por Tlang ryngkat bad ki dak kiba ïadei bad ka jingpang suhkhriat bad ka jingpang flu. Hynrei haduh kine ki sngi ym pat don ba ïoh pang HMPV ha kane ka distrik, la ong ka khubor.
“La bthah ïa ki heh kiba ïadei ban buddien ïa ki jinglong jingman. Ki heh kin hap ban pynneh ïa ka jingïakren bad ka tnad ka koit ka khiah jong ka sorkar pdeng na ka bynta ki jingtip ba man ka por ha kaba ïadei bad ka jingpynkhreh jong ka nongbah jong ka jylla,” ong ka kyrwoh.
Katkum ki jingbthah jong ka tnad ka koit ka khiah jong ka sorkar pdeng, ka long kaba donkam ïa ki hospital ba kin long kiba la pynkhreh bha na ka bynta kano kano ka jingkiew jong kane ka wait jingpang.
Ka HMPV ka lah ban ktah ïa ki briew ha baroh ki rta, watla ki khynnah kiba hapoh san snem, ki rangbah kiba la kham san bad kito kiba don ka bor met kaba tlot ki kham don ha ka jingma.
