Shillong, K’lyngkot 08
Ka Meghalaya Sport Climbing & Mountaineering Association (MeSCMA) ka la sei haduh 13 ngut ki nongkiew lum ban leit mihkhmat ïa ka Jylla sha ka IMF North East Zone Sport Climbing Competition (NESCC) ka ban long ha Roing, Lower Dibang Valley, Arunachal Pradesh.
Ha ka liang ka Sub Junior Girls ki long ka Dadapbiang Lyngdoh (Upper Lumparing), Pynkmenlang Lyngdoh (Upper Lumparing), Aijingsuk Lyngdoh (Upper Lum-paring), Idaseisoh Tongper (Nongtalang) bad ka Mebalaai-shisha Tham (Sohra). Ha ka liang ki shynrang ki long u Mebandonlang Umsong (Lyngkyrdem), Hamebanker Nongsiej (Mawranglang) bad u Givensamson Lyngdoh (Mawlangwir).
Ha ka liang ka Junior Boys ki kynthup ïa u Kyrmenskhem Lyngdoh (Upper Lumparing), Benison Mawlong (Upper Lumparing), Lurshai Nongkhlaw (Upper Lumparing), Atiar Nongkhlaw (Upper Lumparing) bad u Bankyrshanlang Tham (Sohra).
Kane ka prokram kan sdang naduh ka Sngi Palei bad kut haduh ka 11 tarik mynta u bnai. Ïa katei ka kynhun la ïalam da ka Kong Hunlin Lyngdoh kum ka Manager bad la bei tyngka da ka tnat ïalehkai ka Sorkar Jylla halor kane ka jingleit shim bynta jong ki.
Shuh shuh katei ka synjuk ka la sei ruh lai ngut ki nongkiew lum kiba kynthup ïa ka Kayleigh Petra Nongkynrih, u Teimiki Sungoh bad ka Kong Ibakordor Shisha Mary Sawian ki ban ïadon bynta ha katei ka jingïakop kum ki nongbishar (judge), ki nongthaw lynti (route setter) bad ki nongïarap (belayer) na ka bynta kiwei pat ki nongkiew lum.
Halor kane ka bynta, na ka liang ka synjuk kam lah khlem da ai ai khublei ïa ka 58 GTC, Happy Valley kaba la shah sngewbha ïa ki nongkiew lum ka Jylla ba kin pyndonkam ïa ka ‘climbing wall’ ha ka prokram jied ïa ki khynnah bad ruh na ka bynta ka prokram ai jinghikai jong katei ka lympung.
