Shillong, K’lyngkot 08
Ka Mawlai SC ka la lah ban pynliem noh ïa ka Langsning FC da 1-0 kol na ka bynta ban bteng ïa ka jinglamkhmat ha ka OC Blue Shillong Pre-mier League 2024 ha ka Sngi Balang ha SSA Stadium kaba ha First Ground, Polo.
Kane ka la wan urlong lyngba u Khrawkupar Jana, uba la ïoh thep kol ha ka minit kaba 70 hadien ba ka Langsning kam shym la ai suk ban shah rem ha katei ka lahduh jong ka aïom ba la lah.
Lyngba kane ka jingjop ka la pynlong ïa ka Mawlai ban ïoh 19 point na hynñiew sien ïakhun kumjuh ban tam da 3 point ïa ka Shillong Lajong, kaba la hiar sha ka kyrdan ba-ar. Katba ka Langsning ka dang ïaisah ha ka kyrdan ba phra ryngkat 7 poiñ, ha kaba ka la tam ïa ka Nongthymmai SC (7 poiñ) lyngba ka jingpher kol.
Ka Langsning ka la ïoh ïa ka kaba ksiar kaba nyngkong eh tang ha ka minit kaba ar hynrei ka jingpyrshang u Daohipaia Rymbai la shah khanglad noh ha u rangapkol ka Mawlai u Lambhamiki Lamare.
Hadien kata, u Baïai -kara Swer jong ka Mawlai u la pyrshang ban pynbud biang ban shut najngai kumba u la lah ban pynurlong ïa ka Laitkor SC, hynrei ka bol ka la her kham shajngai. Nangta ka jingpyrshang u Arkibor Makhroh ka la shu long lehnohei hadien ba u rangapkol ka Langsning u Rajat Paul Lyngdoh u la lah ban pyllait na ka jingshah thep.
Ka Mawlai ka la hap ban bujli ar ngut ki rangïalehkai shong ben, u Donlad Diengdoh bad u Dibinroy Nongspung, hynrei kim shym la lah ban pynurlong ha ka ban thep kol.
Hynrei dei ha ka kylla miet ba ka Mawlai ka la nang khlaiñ bad ïoh bor lyngba ka jingdon lang jong kitei ar ngut kaba pynlong ïa ka Langsning ban ym lah kyrda ïalade. Dei ha ka minit kaba 70 ba ka Mawlai ka la lah ban pynurlong hadien ba u Baiakara u la ïoh ban rah ïa ka bol na ka bynta ban pynbuh bol ïa u Khrawkupar (u bym shym la pynlehnohei ïa kane ka kabu ksair) bad u rangapkol ka Rajat Paul um shym la lah ban pyllait na ka jingshah thep.
Kane ka lympung kan bteng biang ha ka 14 tarik mynta u bnai ha kaba ka Rangdajied United FC kan pynkhreh ban ïakhun pyrshah ïa ka Sawmer SC ha ka por 11 baje mynstep, katba ka Shillong Lajong ïa ka Laitkor ha ka por 2:30 janmiet.
