Shillong, K’lyngkot 09
Hadien ba pynsangeh ïalehkai shipor, ka Shillong Lajong FC kan bteng biang ïa ka jingïakhun ha ka lympung ïalehkai I-League ha kaba kan ïakhun pyrshah ïa ka Real Kashmir FC ha la ïing ha ka Sngi Thohdieng ha ka por 7 baje mynmiet ha SSA Stadium, Shillong.
Kane ka long ka jingïalehkai kaba hynñiew ïa ka Lajong ha kane ka lympung hadien ba ka la jop shisien, ïakhaid lai sien bad shah rem ar sien na ka bynta ban don ha ka kyrdan khyndai ryngkat 6 poiñ. Katba ka Real Kashmir ka don ha ka kyrdan hynñiew ryngkat 9 poiñ na ki hynriew sien ïakhun.
Dangshen, ha ka jingïakhun kaba la long ha ka 19 tarik u Nohprah 2024, ka Lajong ka la shah rem ha ka Delhi FC da 3-1 kol, katba ka Real Kashmir ka la ïakhaid mar 1-1 kol bad ka Aizawl FC. Te kumta ka Lajong hapoh ka jingïalam u Jose Carlos Rodriguez Hevia ka donkam ban ïalehkai bha ha kane ka jingïakhun ha la ïing na ka bynta ban ïoh ïa ki lai poiñ khnang ba kan lah ban jam sha ki kyrdan ba kham shakhmat.
