B. M. Lanong
La sdang mih ki jingbakla ha ka ktien Khasi lajong, namar ki jingthoh bad jingkren bakla ïa ki katto-katne ki kyntien, kaba la buh ïa ka ktien Khasi ha ka kynrum-kynram na kaba ju long, ïa kaba nga la wanrah ha ïing Dorbar District Council ha ka 20.12.24 ban ïatai.
Khlem da ktaid shane-shatai, la sdang ïa kren bad la ïai thoh ruh shaid shi shaid ha ki kotkhubor, khamtam ïa ki artylli ki kyntien bakla, kum ka kyntien ‘Tehlakam’ bad ka ‘Khyrnit’, namar ki don da kiwei pat ki kyntien, ban pyndonkam haba thoh bad haba kren ruh.
Nga la pynksan ïa ka Mat (Motion) jong nga hapoh ïing Dorbar, ba ka kyntien ‘Tehlakam’ ka dei tang ïa ki kulai, ba ki trai ki pyndeng ïa u lakam ha ka khlieh kulai, khnang ba un ym ïaid sakma ne phet lymwir na ka lynti kaba u ka riwan ne u nongñiah kulai (Jockey) u kwah ba un ïaid.
U Lakam u dei u jingdeng kulai ba la shna kyrpang tang na ka bynta ki kulai, ïa kaba, ha ka ktien Phareng ka long ‘briddle’, kaba ki jockey ne ka riwan kiba shong kulai-pynmareh (race), ki ju pynher kulai ha ka jingïakñieh jop, kaba da ïathong pisa, ïa kaba ha Shillong ruh ha ki phew snem ba la leit noh, ju pynlong harud madan Polo, khap Wah Umkhrah, man la ki sngi Saitjaiñ. Hynrei la pynsangeh noh ïa kane ka jingmareh race ki kulai, ha ki snem 1960 khlieh ei-ei, katba nga lah ban kynmaw.
Tang ban pynbang ïa ka khana, u Bah Shun (Neptune Lyngdoh) uba na Malki, u dei uwei uba sngewtynnad bha ha kane ka kam pynher Kulai ‘race’ bad u Kulai jong u, uba kyrteng u ‘Black Toy’, u dei u kulai uba khlaiñ bha ha ka thup (group) jong u. I Bah Mickey Lyngdoh, footballer bad Coach, iba long u para i Bah Neptune, i lah ban sakhi kham bha ïa kane.
Kumta u Lakam (briddle) u dei uba teh ïa ka khmut kulai, khnang ban pynher ïa u ne pynsangeh da u ka riwan (jockey) uba shnong halor met jong u, katba u sngewbit.
Ban ong ‘tehlakam’ ïa ki kamsniew, ne ïa kino-kino ki jaitkam, kynthup ruh ïa kawei ka jingthoh kaba thoh, “ka bol ka rung namar u goalie (nongapkol) um shym lah ban”teh lakam ïa ka”, ka bakla 100 na ka 100 percent, namar naei yn tehlakam ïa ka bol kaba pyllun lyoin? Nalor kata tang ka jaka teh ruh ym don, lait na kaba thep tang hapoh byrni, ne ha kynja pla.
Ha ka jaka kane ka ktien ‘Teh Lakam’, nga la ai jingmut hapoh ïing Dorbar, ban pyndonkam da ki kyntien- ‘Khanglad, ïada, Kyrda’, ne kum kine ki jait kyntien kiba ïahab bad ka kam bad kiba dei ki kyntien Khasi paka.
Don lei kawei ka jingthoh kaba nga la ïohi dang shen kaba thoh- ‘…..khlem lah ban tehlakam ïa ka ‘jingwan rung ki briew ba nabar….’
Kane lei kaba la pynhiar dor shuh-shuh ïa ka ktien, namar nangno keiñ yn tehlakam ïa ka ‘Verb’? Long sieh ban tehlakam ïa ka ‘jingwanrung’ ka bym don dur ne jaka ba lah ban ktah, kumba lah ban ktah ïa ka khmut, ne khlieh kulai, ne wat ïa ka Bol ruh shi rukom, kaba long ban ktah, kaba dei ka Noun.
Kawei pat ka jingbakla ka long sa ïa ka kyntien ‘Khyrnit’, kaba mih ha ki jingthoh man la ki por, kynthup ïa ka jingpynkylla ïa ka ‘Sixth Schedule’, kaba long ka Aiñ kaba don ha ka Constitution of India, kaba ïadei bad ka Art.244 (2) bad 275 (1), ha kaba la pynrung lane ai jaka ïa ki Autonomous District Council ba kin long ki Dorbar Thaw Aiñ ba ithuh naduh ka sorkar India.
ïa kane ka bynta ruh nga la buhlang da ka mat ïa kren (Motion) ha katei ka Dorbar ba la kdew haneng, namar nga la ïohi ba ki bun ki jingthoh kiba pyndonkam da ka kyntien ‘khyrnit’. Ka kyntien ‘Khyrnit’, lada peit ha ki dictionary ki dei ki sopti phong ki kynthei kiba pynpur itynnat bad ki jingpynwan dur ïa ki ïing ki sem ruh (cornice), ha ka ktien Phareng.
Kane ka kyntien ka bakla shibun eh na ka jingmut jong ka “6th Schedule”.
Namar ba ngam ïoh ïa ka kyntien kaba biang, ne da kaba kham biang ban ïa katei haneng, nga la pynkylla ïa ka”6th Schedule”da ka kyntien ‘Bynrap Bahynriew’, ha ka kot kaba nga la pynkylla Khasi ïa baroh kawei ka ‘6th Schedule Phareng’.
ïa ka kyntien ‘Bynrap’ nga la pynwandur namar ïa baroh 12 tylli ki Schedule kiba don hapoh ka Constitution of India, haduh mynta, la pynrung ter-ter ne bynrap hapoh ki Article bapher jong ka Constitution ka Ri India hi.
Ban ai nuksa, ïa ka 6th Schedule District Council, la pynrung hapoh ki Article 244 (2) bad 275 (1) ka Constitution; ïa ka 12th Schedule pat kaba ïadei bad ki bor Municipal ha ki jaka sor, la pynrung ne bynrap hapoh ka Article 243 W jong ka constitution.
Kumta, ka kham ïajan shibun ka kyntien ‘Bynrap’ kumba la kdew haneng, ban ïa ka kyntien ‘Khyrnit’, kat bym pat ïoh da kiwei. Kaba sngewtynnat ka long ba ka Dorbar District Council ha ka jingkynthoh u Bah Pynïaid Syiem CEM, ka la ïahab jingmut ïa ki jingkdew jong nga, baïa mynta hi, ban pyndonkam bakla ïa ki kyntien ‘Teh Lakam’ bad ‘Khyrnit’, dei ban kiar.
