Shillong, K’lyngkot 13
Ka Laitkor Dorbar Pyllun ha ryngkat u Bah Lambor Malngiang, MDC ka Nongkrem ha ka Lah Sngi U Blei, ki la pynkup burom ïa ka kynhun ki ‘thei ïalehkai jong ka Laitkor kaba la rah ïa ka nam lahduh ha ka Women’s Football League 2024 ba la pynlong da ka Shillong Sports Association ha madan Polo.
Ha kane ka jingïalang nalor u Bah Lambor Malngiang uba ju noh synñiang shibun ha ka ban ïarap ïa ka Laitkor Sports and Cultural Club kum u kongsan, la ïa donlang u Pa’iem Ainam Manik Syiem, Syiem ka Hima Mylliem, ki nongïalam ka klob, ki nongshong shnong, ki ‘thei ïalehkai kynjatbol lem ki kmie ki kpa.
Kum ban shu kdew, ka Laitkor Sports Club Women’s Football Team ka la pynliem ïa ka Pay For Right Football Academy da 2-0 kol ha ka jingïakhun phainal kaba la long ha ka 30 tarik u Nohprah 2024 ha madan 1st Ground, Polo.
Na ka liang u MDC kum ka dak ka jingsngewkmen bad jingsngewsarong, u la noh synñiang da ka khusnam pisa sha iwei-pa-iwei i dkhot ka kynhun ha ryngkat ki jingai sngewbha.
Haba kren ha ka jingïalang, u Bah Lambor u la pynpaw ba ki khun samla ki hap ban long kiba la khreh ban ïakhun pyrshah ïa kiba bun ki jingeh ha ka jingïaid lynti jong ka jingim bad kino-kino ki kam kiba ki leh ne trei. U la bynrap ban poi sha ka thong ka jingjop donkam ka jingskhem jingmut bad ka jingtrei minot.
