New Delhi, Kyllalyngkot:
Ka Myntri Rangbah jong ka Delhi, ka Atishi kaba dei ka kyrtong ka seng AAP, ka la thep kyrteng hynnin ka sngi, na Kalkaji Assembly konstitwensi, na ka bynta ka ilekshon sha Delhi, kaba la buh ban long ha ka 5 tarik, Rymphang.
Ha ka jingpyllait khubor ha ka rynsan X, ka Atishi, ka ong ba nyng-kong, kan leit jngoh ïa ka Kalkaji Temple, ban ïoh ïa ka jingkyrkhu jong ka Kalka Maa.
Haba ïakren bad ki nongthoh khubor, kane ka nongïalam ka AAP ka la thong ïa ka BJP, da kaba kynnoh ba ka leh ïa ka “Farzivada” ha ka jingthep vote sha ka Assembly.
“Ka BJP ka la ju mlien ban jop ilekshon lyngba ka ‘farzivada’. Ki lah ban leh ïa kane ha Maharashtra bad Haryana ruh, hynrei ha Delhi, ki la shah kem. Naduh ka 15 tarik Nohprah haduh ka 8 tarik, Kyllalyngkot, ki la don 13,000 tylli ki aplikeshon ban thep vote thymmai ha New Delhi Legislative Assembly. Ka paw shai ba ka BJP ka pynleit jingmut ha ka jing-leh thok. Ngin ym ailad ïa ka BJP ban leh ei ei kaba bakla. Ka BJP ka la don ha ka bor synshar ha ka sorkar kmie la palat 10 snem, bad ki la leh aiu na ka bynta ki paidbah kiba dei ki nong Delhi? Ka kam jong ki ka long tang ban pyndonkam bakla ïa u Kejriwal, kim don ruh ka jingphai khmat sha ki Myntri Rangbah ne na ka bynta kano kano ka jingthmu,” la ong ka Atishi.
Ka nongïalam jong ka seng AAP ka don ha ka jingïakhun ilekshon pyrshah ïa u kyrtong ka BJP u Ramesh Bidhuri bad ka Alka Lamba jong ka seng Congress na ka bynta ka shuki Kalkaji.
Ha kajuh ka por, tang hadien hynriew kynta ba ka la pan pisa na ki briew ban bei tyngka na ka bynta ka jingïalap ilekshon sha ka ïingdorbar thawaiñ jong ka, ka Atishi ka la ïoh pisa palat T. 15 lak lyngba ka Online jong ka ha ka Sngi U Blei.
Ka Atishi ka la buh thong ban ïoh lum T. 40 lak kum ka pisa ban ïalap ilekshon jong ka, da kaba ïakhun na ka thaiñ Kalkaji Assembly konstitwensi.
Kane ka jingkyrshan jong ki paidbah ka la ai mynsiem ïa kane ka nongïalam khamtam ba kan lah ban pyndep ïa ki jingdonkam khnang ba kan lah ban shakri hok ïa u paidbah.
Kumba ka long haduh ka 10 tarik, Kyllalyngkot, kata haduh ka por 5:30 janmiet, ka jingnoh synñiang sha ka seng kumba ka paw ka pyni ba ki la don 278 ngut ki briew kiba la noh synñiang ha kaba baroh ka jingïohlum ka la long da T. 15,15,930 sha ka.
Kham ha shwa, ka Atishi ka la phai sha ka jingïarap pisa paidbah, da kaba pynshisha ba ki briew ki la noh synñiang pisa ban kyrshan ïa ka “politik kaba hok” jong ka seng bad ba ka seng kam shim pisa na ki nongkhaïi.
“Ki briew ki la noh synñiang pisa ban kyrshan ha ka ban pynïoh ïa ka saiñ pyrthei kaba hok jong ka Aam Admi Party. Ngim shim pisa na ki nongkhaïi na ka bynta ka ilekshon. Ka sorkar AAP ka trei na ka bynta ki rit paid. Na ka bynta ka ilekshon jong nga na ka Kalkaji, nga pynlong ïa ka jingïalap paidbah na ka bynta T.40 lak, kaba Nga donkam na ka bynta ka ilekshon. Ki briew ki lah ban ai kano kano ka pisa kaba ki kwah,” la ong ka Atishi ha ki nongthoh khubor hangne ha ka sngi U Blei.
Ka jingthep vote na ka bynta ka ilekshon Assembly ha Delhi kan long tang na ka bynta kawei ka bynta kata ha ka 5 tarik, Rymphang bad ka jingñiew ïa ki vote kan long ha ka 8 tarik u Rymphang.
