D H Kharkongor
Ka por ka tyllun stet stet naba ngi lah kut artat ka taïew kaba ar ka jong une u bnai uba nyngkong jong une u 2025. Ngin rung noh sa sha ka taïew kaba lai. Namar kata, ym artatien ba man la ka ïing ka lah loit ka lah law noh phar ïa baroh ki jingpynriam pynitynnad, kiba ïadei bad ka jingrakhe kyrpang ïa ka ‘Christmas’ lem bad ïa ka ‘New Year’. Te kumta ym artatien ba lah loit lah law noh naduh ïa u Khlur, ki jingwah pynthaba lem bad ki kiwei kiwei de ki jingwah pynitynnad ïa u Christmas Tree bad namar kata tad haduh ïa u Christmas Tree hi ruh. Lah ban ong ba ïa ki baroh lah lum lah lang bad la thep bha khop sha ka kyndong kaba kyrpang. Ka jaka ha kaba yn klet noh shwa ïa ki tad haduh ynda poi biang ka Christmas. Nga kyrmen ba kan nym long pat kumta kumjuh bad u Jisu Khrist uba ngi dang shu dep ban rakhe ïa ka jingmaïan jong ka jingwan long briew ka jong U, kum U Blei, shane sha pyrthei. Nga kyrmen ruh de ba kan nym long kumta kumjuh bad ki ‘New Year Resolutions’ ne ki jingrai kiba lem bad ki jingkut jingmut kiba skhem, kiba ïadei bad une u snem thymmai, u 2025. Ngin ïa kyrmen ruh ba kum kita ki Lai Ngut ki Riewstad, ngin nym ïa leit phai biang noh ruh na kajuh ka lynti, hadien kaba da ïashem shisha markhmat bad la u Jisu Khrist. Nga kyrmen pat ruh ba ngi ïa sngewthuh shai kaei kata ka lynti kaba thymmai ne ïa ei ba ka thew.
Hynrei u briew un dang ïai dei hi tang u briew (a mere mortal), uba tlot, uba bun ki jingduna ba kumta tang shu pher wiak u lah hap biang noh ne kyllon biang khram. U briew u dang dei hi tang u briew ba wat la u kut jingmut skhem pynban un dang ïai mad ïa shibun ki jingpynshoi ki jingpynshad. Te wei ba u dang ïaidei hi tang u briew ba u bapli un dang ïai ngop lor shilor, un dang ïai jynthut shi jynthut hi ruh ha u juh shi u juh u maw jynthut. Ym tang kumta hynrei wat U Blei hi ruh un dang ïai tynjuh bad un dang ïai phrang ïa u, da kiba bun ki rukom.
La u briew u dei tang u briew pynban U Blei u thrang bad u angnud ba u briew, wat lada un dang don ha ka pyrthei, un ym pynïasyriem ïalade bad kane ka pyrthei. Kiba sngewthuh ki sngewthuh da kumno ba ym dei ban pynïasyriem ïalade bad kane ka pyrthei. Hynrei ngim dei pat ban dang sngewphylla lada, wat ha shwa ban kutnoh ka taïew kaba nyngkong, u briew u lah da phaidien biang ne poi biang tiap sha ka jinglong kaba kumba u ju long. Phylla lei, yn beiñ ruh lei,wei ba u briew u dang dei hi tang u briew. Ka pyrthei ruh kan dang ïaidei hi ka pyrthei, kaba dap da ki jingpynshoi bad ki jingpynthame kiba har rukom. Ka dohnud u briew pat ruh kaba shukor. Wat la ki jingpynthame jong ka pyrthei ki bun pynban sngewtynnad ban shem ba kiba bun ki la nang kumno ban rakhe naduh ïa ka Christmas tad haduh ïa ka New Year. Ka jing-rakhe kaba sah jingkynmaw, kaba khlem kano kano ka jingbabe ne ka jing-lehraiñ.
Ka don ka por ïa kiei kiei baroh. Ka por ban it ban wad bad ban sngewthuh shwa ïa la ki jingduna bad ki jingbakla. Kaei kaei kaba lam ban kut jingmut ban long u briew uba kham bha ban ïa kaba ha u snem ba la dep. Ka jingkut jingmut kaba lam sha ka jingangnud ban pynbeit noh ïa la ki jong ki jingduna ki jingbakla ne ban jopshisyndon noh ïa kiei kiei kiba u ju shah rem. Kum ka nuksa ban jop noh ïa ka jing-long khoi khoi, ïa ka jingdomriang, ïa ka jingkhim jingmut jingpyrkhat, ïa ka jingkhim mynsiem, ïa ka jingkhñium jingkhniam than eh bad wat ïa ka jingkhuslai than eh la ïa kaei kaei ruh. Kiwei lehse ban jop noh ia ka jingsarong ne ban jopnoh ïa ka jinglong kaba rhah beit khmang tang ïa la ka jong ka suk ka saiñ. Kaba katno tam ban rhah ïa la ka suk ka saiñ bad ka bha ka miat da kaba pynjynjar pat de ïa kiwei. Ka jingshisha ka long ba kiba bun ym tang ba ki sngewthuh ïa la ki jong ki jingduna bad ïa la ki jong ki jingbakla hynrei ki da thrang hi ruh kat ban ïaipyrshang ban pynbeit ïa kita baroh. Ki bapli kin dang iai don ha ka jingïaleh, kaba man la ka sngi.
Kumno lada ngin tehlakam noh ïa la u jong u thylliej bad ngin sharai ruh de ïa la ki jong ki rymmiang shyntur ? Kumno lada ngin kiar noh shisyndon na ka lorni ka lorhah bad ruh na ka kren sniew ka kren smeh,la ïano ïano ruh ? Kumno lada ngin kiar noh shisyndon na kino kino ki jingïataiñia ne ki jingïapher jingmut ki ban ym lam shano shano ruh lane tei ïano ïano ruh? Kumno lada ngin ïa sangeh shisyndon noh ïa ka jingbishar bad namar kata ïa ka jingñiewtang ïa ki lait ki let ki jongno-jongno ruh? Kumno lada ngin ym bishni ne pihuiñ la ïano ïano ruh? Kumno lada ngin ym khwan lym ne rhah khlemakor la ïa kaei kaei ruh ? Kumno lada ngin shu ïa kiar beit noh ïa baroh kiei kiei ki ban lute pynban ïa ka jingsuk bad ka jinghunmynsiem kaba shisha, kaba ngi dei ban don?
Ngim dei ban khate noh pynban ïa la ka jong ka jingsuk bad ïa la ka jong ka jing-kmen. Namar kata yn nai khmih lynti ba baroh kin sngewthuh ïa ngi bad kampher lada kim pdiang ïa ngi kumba ngi long. Ynnai sngewsih lada kiwei ki sngewthuh bakla ïa ngi bad kampher lada kim ïa hap jingmut bad ngi. Ym dei ban sngewphylla lada kim shem kano kano ruh ka jingbha ha ngi. Ym deihi ruh ban khulai jingmut than eh uba kumno un long une u 2025. Une ruh un long bad un kutkat kum ka mon ka jong U Blei, uba nalor.
