New Delhi, Kyllalyngkot:
Ka Union Home Ministry ka la ai jingmynjur ïa ka kynhun Enforcement Directorate (ED) ban pynngat ha ki kyndon aiñ ïa u heh nongïalam jong ka seng ka Aam Aadmi Party (AAP) u Arvind Kejriwal bad ïa u Myntri barim u Manish Sisodia ha ka mukotduma jong ka jingkamai ïa ka spah bymhok kaba don jingïadei bad ka kam thok kaba la mih na ka jingpyntreikam halor ka kyiad ha Delhi.
Kane ka rai jong ka Ministry ka long hadien ba u Lt. Governor ka Delhi u VK Saxena u la ai ïa ka jingmynjur ban pynngat ïa u Myntri Rangbah barim ka Delhi ha kane ka mukotduma.
Ha ka hukum ha u bnai Naiwieng jong mynshem snem, ka Supreme Court ka la ong ba ka kynhun ED ka hap ban shim ne pan jingbit shwa ban pynngat ïa ki nongtrei sorkar ha ki kyndon aiñ.
Ha u bnai ba bud, ka kynhun tohkit ka la thoh sha u VK Saxena, da kaba ong ba dei ban ai ïa ka jingbit naba u Kejriwal u dei u “dei uba hakhmat eh ne u snar nongïalam ha ka ban ïasuhbuit kam sniew” jong kane ka kam klop tyngka.
Na ka liang jong u heh ka AAP, u la leit sha ka Delhi High Court, da kaba ong ba ka jingpynngat jong ka tnad tohkit pyrshah ïa u bad kiwei pat ha katei ka mukotduma, ka long kaba beaiñ namar ba ym shym la shim ïa ka jingmynjur shwa jong ki bor synshar shwa ban ujor ïa ka ejahar jong ka jingshah pynngat.
Ka mukotduma pyrshah ïa u Kejriwal ka long halor ka jingkynnoh ba u don ki jingleh bymhok ha kaba thaw ïa ka polisi khajna jong ka Delhi kaba la jah noh mynta na ka bynta u snem 2021-22.
La kynnoh ba u Myntri Rangbah barim ryngkat bad kiwei pat ki nongïalam ka AAP, kynthup ïa u Sisodia, ki la thmu ban thaw ïa ki jingkhanglad ha ka polisi ban ïoh bam tyngka na ki briew kiba die kyiad kiba ju pynbiej ïa ki briew sorkar.
U la shahkem nyngkong ha ka kynhun ED ha ka 21 tarik, Lber, 2024, ha kaba ïadei bad katei ka kam kamai pisa.
Hadien kane, ka kynhun Central Bureau of Investigation (CBI) ka la kem ïa u Kejriwal ha ka 26, Jylliew, 2024 halor ka kam bamsap.
Ha u Nailur, 2024, ka Supreme Court ka la ai jamin ïa u heh ka seng AAP. Tang katto katne sngi hadien ba u la ïoh jamin, u Kejriwal u la iehnoh ïa ka kam kum u Myntri Rangbah ka Delhi, kaba la plie lad ïa u Atishi, u heh jong ka seng AAP ban bat ïa ka kam ba ha khlieh duh.
Ha kajuh ka por, u Sisodia u la mih noh na phatok ha u Nailar, 2024, kata 17 bnai hadien ba u la shah kem ha ka kynhun ED bad ka kynhun CBI ha kaba ïadei bad ka mukotduma halor ka rukom pyntreikam halor ka kyiad.
