Shillong, K’lyngkot 15
Ka Mawlai SC ka la ïai bteng ban bat ïa ka kyrdan ba ha khlieh duh ha ka OC Blue Shillong Premier League 2024, hadien ba ka la lah ban pynliem noh ïa ka Nongthymmai SC da 2-1 kol ha ka Sngi Balang ha SSA Stadium kaba ha First Ground, Polo.
U Romarius Laban (31) lem bad u Brolington Warlarpih (66) lyngba ka penalty ki la thep kol na ka bynta ka Mawlai, katba u Rudolf Shadap ha ka minit 58 u la lah ban pynphai na ka bynta ka Nongthymmai.
Kane ka jingjop ka la pynlong ïa ka Mawlai kum ka kynhun kaba khlem pat shah rem na ki phra sien ïakhun ryngkat 22 poiñ. Katba ka Nongthymmai ka dang ïai sah ha u dak jong ka jingma ryngkat 7 poiñ na ka bynta ban ïaryngkat bad ka Lang-sning FC kaba la tam lyng-ba ka jingpher kol.
Wat la ka jingïakhun ka la long kaba ïakhaid bha, hynrei hadien shiteng kynta u Romarius u la ïoh ban pynkhih jar na ka bynta ka Mawlai. Kane ka dei ka jingïakhun kaba nyngkong jong u ha ka OC Blue SPL 2024 ha kaba u la shah kynthup ban ïoh ïalehkai naduh kaba sdang bad u la pyndonkam hok ïa ka kabu ba u ïoh lad.
Khyndiat minit ha shwa, u Reformer Pale, uwei pat u rangïalehkai bathymmai ha ka kynhun ba sdang, u la ïakhun tyngeh ïa u nongapkol ka Nongthymmai, u Akash Thapa da kaba shut tyngeh, hynrei utei u nongapkol u la lah ban kyrda na ka jingshah thep kol. Hadien u Akash u la lah ruh ban kyrda na ka jingshah thep ha u Mark Gareth Shabong.
Wat la kim shym la ïoh jingjop kumba ki la angnud, hynrei ka Nongthymmai ka ju pyrshang ban ïakhun tyngeh na ka bynta ban pynphai kylla bad dei ha ka minit kaba 58 ba ka la lah ban pynurlong lyngba u Rudolf ha kaba u rangapkol ka Mawlai u Lambhamiki Lamare um shym la lah ban leh eiei.
Hadien katto katne por ka Nongthymmai kam shym la lah ban leh eiei hadien ba ka la shah thep biang sa shi kol lyngba ka penalty ba la shut da u Brolington ha ka minit kaba 66 bad ha kaba kut ka la mad ïa ka jingshah rem.
Kane ka lympung kan bteng biang ha ka Sngi Thohdieng ha kaba ka Langsning kan ïakhun pyrshah ïa ka Rangdajied United FC ha ka por 2:30 nohphai sngi.
