Raipur, Kyllalyngkot:
Ki la don kumba 12 ngut ki lehnoh Naxal kiba la shah pynïap ha ka jingïakhun kaba jur bha bad ki bor pahara ha ka District Bijapur jong ka Chhattisgarh ha ka sngi Palei, ong u heh pulit. Kane ka long tang hadien katto katne sngi ba 8 ngut ki pulit ki la ïap ha ka jingbthei bom IED ha kane kajuh ka distrik.
Ka jingïasiat kaba markylliang ka la jia ha ka por 9 baje mynstep ha ki bynta jong kawei ka khlaw jong ka thaiñ ba shaphang Shathie jong ka Bijapur ha ka por ba ka kynhun ba ïatreilang jong ki bor pahara ka dang don ha ka jingïakhun pyrshah ïa ki lehnoh Naxal bad ka jingïasiat kaba man ka por ka la neh haduh ban da janmiet, u la ong.
Ki briew kiba dei na ka District Reserve Guard (DRG) jong ki pulit ka jylla na ki lai tylli ki distrik, san tylli ki kynhun shipai CoBRA (Commando Battalion for Resolute Action – ka kynhun ïaleh thma ka khlaw ba pawnam jong ka tnat CRPF) bad ka kynhun shipai 229 jong ka CRPF ki la don bynta ha kane ka jingleit khynra lehnoh, u la ong.
“Katkum ka jingtip ba la ïohlum hashwa, la ong ba ki la don kumba, 12 ngut ki Naxal kiba la ïap ha katei ka jingïasiat kaba markylliang. La ap ïa ki jingtip ba bniah namar ba ka jingkhynra ka dang ïaid shakhmat ha katei ka jaka,” la pyntip shuh shuh u heh pulit.
Ym shym la don kano kano ka jingmynsaw ïa ki shipai kiba la don bynta ha ka jiungïasiat, u la ong. Ki Maoist ki la mad ïa ka ka jingduhnong kaba khraw ha ka jingïakynduh bad ka jingïasiat kaba markylliang ha kaba la ong ba ka jingïap jong ki dkhot ka kynhun jong ki ka lah ban nang kiew, la ong shuh shuh u heh pulit.
Katei ka jaka ba la don ka jingïasiat ka don kumba 150km eiei ka jingjngai na ka jaka treikam jong ka distrik bad ïa kane ka jaka la shim ba ka dei ka jaka ba khlaiñ jong ka kynhun ki Maoist Battalion No. 1, ka kynhun ïaleh kaba khlaiñ tam jong ki ha ka thaiñ Bastar, ong ka khubor ba la wan na ki pulit.
Da kane, ki la don baroh kumba 26 ngut ki Naxal kiba la shah pynïap ha ki jingïasiat ba markylliang ha ka jylla haduh mynta u bnai.
Ha ka 12 tarik, Kyllalyngkot, ki la don kumba 5 ngut ki Maoist, kynthup ïa arngut ki kynthei, ki la shah pynïap ha ka jingïasiat bad ki shipai ha ka thaiñ kaba hap hapoh ka jingkhmih jong ki pulit ka Madded jong ka Bijapur distrik.
Ha u snem ba la lah, ki la don kumba 219 ngut ki Naxal kiba la shah pynïap ha ki bor pahara ha ki jingïasiat ba la jia ha kylleng ki jaka ha kane ka jylla.
Ha ka 6 tarik, Kyllalyngkot, ki la don kumba 8 ngut ki shipai jong ka kynhun DRG bad uwei u nongñiah kali paidbah kiba la ïap ha ka por ba ki Naxal ki la pynbthei ïa ka kali jong ki da u bom IED uba khlaiñ bor bha ha katei ka distrik.
Katei ka jingbthei bom, ka la jia hajan ka shnong Ambeli, kaba hap hapoh ka jingkhmih jong ki pulit ka Kutru, ha ka por ba ki bor pahara, ki dang wan phai da ka kali Scorpio jong ki, hadien ka jingpynlong ïa ka jingleit khynra pyrshah ïa ki Naxal.
