Aizawl, Kyllalyngkot:
U Chief General barim u Vijay Kumar Singh u la bam smai kum u Lat bathymmai jong ka Mizoram ha ka sngi Palei. U dei u Lat ba 25 naduh ba ka Mizoram ka la ïoh ïa ka jylla ha u snem 1987.
U Singh u la mih ha ka jaka jong u Hari Babu Kambhampati, uba la shah thung kum u Lat jong ka Odisha. U Chief Justice jong ka Gauhati High Court, u Vijay Bishnoi, u la pynbam smai ïa u Singh, ha ka jingïalang, kaba la long ha Raj Bhavan ha Aizawl.
Ha kane ka jingbam smai la don lang u Myntri Rangbah ka jylla u Lalduhoma bad ki para dkhot jong ka kynhun Myntri, u Lalbiakzama u Lamphang jong ka Assembly, u Lalfamkima u Symbud Lamphang jong ka assembly, ki MP, ki nongthaw aiñ, ki heh ophisar bakongsan bad ki heh pulit.
Ha kane ka sngi la ïashim bynta ruh arngut ki Myntri Rangbah barim ka jylla u Lal Thanhawla bad u Zoramthanga nalor ki nongshah khot kyrpang na ki Balang bad ki seng bapher bapher.
U Singh uba la long mynshwa u Myntri ka sorkar kmie, u la shah thung kum u Lat jong ka Mizoram da ka President ka ri ka Droupadi Murmu ha ka 24 tarik, Nohprah namar ba u Lat ba la dei ban mih noh u Hari Babu Kambhampati u la shah thung kum u Lat bathymmai jong ka Odisha.
Watla ha kaba sdang la buh ban pynlong ïa ka jingshim smai ha ka 9 tarik, Kyllalyngkot, hynrei la pynkynriah noh sha ka 16 tarik, Kyllalyngkot namar ka jingbym don ha ka met ba koit ba khiah jong ki bahaïing hasem jong u Singh.
