Bengaluru, Kyllalyngkot:
Haba pynpaw ïa ka jingïasnohktilang bad u Jagjit Singh Dallewal, u nongïalam jong ka kynhun ki nongrep uba dang pynlong mynta ïa ka jingshah thngan ha Punjab, u President jong ka Federation of Karnataka State Farmers’ Organizations u Kuruburu Shanthakumar u la ong ba yn pynlong ïa ka jingïaid paidbah da ki Tractor ha ki distrik bad ki thaiñ ba marpdeng ha ka 26 tarik, Kyllalyngkot.
U Dallewal, uba dei u nongïalam jong ka seng Samyukt Kisan Morcha, u la shah thngan mynta la 52 sngi ha khappud Khanauri ha Punjab, halor ka aiñ kular jong ka Minimum Support Price na ka bynta ki mar rep na ki nongrep.
Haba ther tyngeh ïa ka sorkar kmie, u Shanthakumar u la ong ba 111 ngut ki nongrep ki la sdang ban shah thngan ha Khanauri, da kaba ong ba ki kloi ban aiti la ka jingim ryngkat bad u Dallewal.
“Ha ka por ba u Myntri Rangbahduh ka ri u Narendra Modi u dang long Myntri Rangbah ka Gujarat ha u snem 2014, u la kren shaphang ka jingïakhun jong ki nong-rep, ka MSP, ka kaiphot jong u Swaminathan bad kiwei kiwei. Mynta, u la klet noh ïa ki jingkular jong u baroh. Ka jingïakhih ka long ban pynkynmaw ïa u, ïa ki jingkular jong u”, la ong u Shanthakumar.
U la bynrap ba ka sorkar kmie ka pyrshang ban pyntlot ïa ka jingïaid lynti jong ki nongrep da kaba pynkylla ïa ka jingpyrkhat jong ka.
Ka jingïakhih ba dang ïai bteng haduh mynta ka long shi bynta ka jingkut jingmut jong ki nongrep ban ïoh ïa ka hok ba la kular ban pynïoh sha ki khamtam ban pyllait ïa ki jingeh ba ki ju ïakynduh na ka por sha ka por. Ki la pynpaw ba ka sorkar kam sngewthuh ei ei ïa ki jingeh ba ki mad.
Ka Nawab Singh Committee kaba la khlieh da u nongbishar ba la shongthait jong ka High Court ba la thung da ka Supreme Court ban shim khia ban pynbeit ïa ki jingeh jong ka jingïaleh jong ki nongrep ha khappud Delhi, ka la ai ïa ka kaiphot ba shipor jong ka ha ka 22 tarik, Naiwieng.
Ka komiti ka la ai jingtip ba ka long kaba donkam ban pyntreikam ïa ka rukom ai jingkular MSP na ka bynta ki mar rep jong ki nongrep, hynrei ka sorkar kmie kam jubab ei ei, la ong u Shanthakumar.
La mynjur ruh ïa ka rai ha ka jingïalang jong ki nongïalam ki nongrep ha Bengaluru ha ka sngi Palei jong ka taïew ba la lah, ha kaba pan ïa ka jingïarap jong u President ban bthah ïa ka sorkar kmie ban pynlong ïa ka jingïakren bad ki nongrep kiba shah thngan, ki jingpynsngewthuh ha ki shnong, ki thaiñ, ki shnong bad ki District Centre, ki long shi bynta jong ka ka jingpynbeit.
