Raipur, Kyllalyngkot:
Ki la don kumba 14 ngut ki lehnoh Maoist kiba la ïap ha ka jingïasiat bad ki pulit jong ka Chhattisgarh ha Gariaband distrik ha khappud jong ka Jylla bad ka Odisha ha ka Sngi Ba-ar, la ïathuh ka lad phah khubor, katkum ka jingïathuh jong ki pulit. Kumba la kheiñ na kine kiba la shah siat, la ong ba ki kynthup ïa ar ngut ki kynthei kiba la shah pynïap ha ka Lah Sngi U Blei ha ka por ba la don ka jingkhynra lehnoh.
Uwei u Maoist uba la shah thong ka khlieh kumba T. 1 klur ruh u la ïap ha kane ka jingïasiat kaba markylliang, la ïathuh ki pulit bad bynrap ba ka jingïasiat haduh ba la thoh ïa ka khubor ka dang ïaid shakhmat.
Ha ka shisngi shwa kane ka jingjia ba dang shen, ki la don ar ngut ki lehnoh kynthei kiba la shah pynïap bad uwei u shipai ka kynhun CoBRA u la mynsaw ha ka jingïasiat kaba markylliang, ka jingïasiat kaba kaba dang shen ka la jia ha ka miet jong ka Lah Sngi U Blei bad ha ka step jong ka Sngi Ba-ar ha kawei ka khlaw kaba don hapoh ka jaka jong ka thanat Mainpur ha shilynter ka khappud Chhattisgarh-Odisha, la ïathuh da ki heh pulit ha ki nongthoh khubor, da kaba bynrap ba ki la don sa 12 ngut shuh shuh ki Maoist ki la shah pynïap.
U heh pulit u la ïathuh ruh ba ka kynhun ba ïatreilang jong ki shipai pahara na ka District Reserve Guard (DRG), Central Reserve Police Force (CRPF), CoBRA na Chhattisgarh bad ka Special Operation Group (SOG) na Odisha ki la ïadon bynta lang ha kane ka jingleit khynra lehnoh.
Nalor kane, u heh pulit u la ïathuh ruh ba ïa kane ka jingleit khynra la sdang ha ka miet jong ka 19 tarik, Kyllalyngkot, hadien ba la ïoh jingtip halor ka jingdon jong ki lehnoh Maoist ha ka khlaw Kularighat Reserve jong ka Chhattisgarh, kaba jngai tang 5 km na khappud jong ka Nuapada distrik jong ka Odisha.
Ar ngut ki Maoist kiba dei ki kynthei ki la shah pynïap ha ka jingkhynra ha ka Lah Sngi U Blei, bad la lap ïa ka jaka buh tiar siat, ki kuli bad ki bom IED kiba bun, kynthup ïa ka suloi Self-Loading Rifle kaba pyndap hi dalade, na ka jaka ba la ïakynduh, la ong u heh pulit.
Kane ka jingpynshitom beiñ ïa ki Maoist ka dei shi bynta jong ka jingkular jong ka sorkar pdeng ban “pynkut noh ïa ki kam pyntriem jong ki lehnoh Naxal” ha u snem 2026, ka jingkular kaba u Myntri ka tnat ki kam pohïing jong ka sorkar pdeng u Amit Shah u la pynpaw biang haba 8 ngut ki shipai District Reserve Guard (DRG) bad uwei u nongñiah kali ki la duh noh la ka jingim hadien ba ka kali jong ki ka la shah pynbthei ha ki Naxal da kaba pyndonkam da u bom IED ha Bijapur jong ka Chhattisgarh ha ka 6 tarik, Kyllalyngkot.
La ïathuh ba katei ka jingbthei bom, ka la jia ha ka surok Bedre-Kutru ha Bijapur distrik. Ki jawan jong u DRG Dantewada, ki dang wanphai da ka kali Scorpio, hadien ba ki la ïatreilang, ong u IG. Kane ka jingkhynra lang ka dei jong ka Dantewada, Narayanpur bad ka Bijapur, la bynrap biang u IG Bastar.
Ka jinghiar thma jong ki Maoist ïa u DRG, ka kynhun jong ki pulit jong ka jylla, ka dei ka jinghiar thma kaba khraw tam ïa ki bor pahara da ki Naxal ha kine ki ar snem ba la dep, la ong ka lad phah khubor kaba la wan na uwei u heh pulit. Ha ka 26, tarik, Ïaïong 2023, shiphew ngut ki pulit bad uwei u nongñiah kali paidbah, ki la ïap hadien ba ki Naxal, ki la pynbthei ïa ka kali jong ki, kaba dei shi bynta jong ka kynhun ïaid kali, kaba kit ïa ki bor pahara, ha ka distrik Dantewada, kaba marjan.
