Bengaluru, Kyllalyngkot:
Saw ngut ki kynthei bad uwei pat u briew ki la ngat ha ki kti jong ki pulit ha ka Lah Sngi U Blei ha kaba ïadei bad ka jingdie be-aiñ ïa uwei u khunlung ba dang hynriew bnai ha ka dor T. 4 lak, ong u heh pulit jong ka Belagavi, u Bhimashankar Guled, da kaba bynrap ba ïa une u khunlung la pynïakhlad na ka kmie jong u ha ka por ba u dang lai bnai.
Ha ka jingïakren bad ki lad pathai khubor ha ka Lah Sngi U Blei, u SP Guled u la ïathuh ba kawei ka longkmie, ka bym shym la pynpaw kyrteng, ka la aiti ïa la u khunlung ba dang lai bnai ha ka Lakshmi, ka nongïarap ha ki kam shongkha kaba la pynbeit ïa ka jingïashongkha kaba arsien jong ka. “Ka Lakshmi, kaba donkti ha ka jingkhawai shongkurim jong katei ka kynthei, ka la shim ïa u khunlung da kaba ong ïa ka, ba ki nongshong kurim thymmai ki dei ban ïoh por ha ka ban pynlut tang ma ki hi”, u la ong.
“Hadien kata ka Lakshmi ka la aiti ïa une u khunlung ha ka Sangeeta, ka long-kmie na Kolhapur, kaba ha kajuh ka por, ka la die ïa une u khunlung sha ka Anasuya jong ka Halyal ha Uttara Kannada. Nangta ka Anasuya ka la die ïa une u khyllung ha u Dilshad, uba sah ha Belagavi, ha ka dor T. 4 lak. Ka Dilshad bad u kurim jong ka, kiba la don lypa arngut ki khun kynthei, ki la thied ïa u khun namar ba ki kwah ïa u nongïoh pateng ha ka longïing”, u la ong.
“Ka Anasuya ka la pyntip sha u Dilshad ba uta u khynnah u dei u khunswet. Hynrei hadien lai bnai, ka kmie jong u khunlung, na Sultanpur ha ka thaiñ Hukkeri, ka la ïakynduh ïa ka Lakshmi ban kylli shaphang u khunlung jongka. Haba ka Lakshmi kam shym la jubab, katei ka kmie kaba la jynjar ka la leit sha kawei ka seng treimon sngewbha, kaba la iarap ia ka ban wanrah ia katei ka mukotduma sha ki pulit ha ka taiew ba la dep,” u la ong.
Hadien ka jingujor, ki pulit ki la thaw saw tylli ki kynhun ban tohkit halor ka jingjia. Kawei na ki kynhun ka la buddien ïa une u khunlung sha ka thaiñ Bailhongal. U la ong ba kine kiba la shah kem ki dei kiba la tip kyrteng kum ka Dilshad Sangeeta, ka Anasuya, bad ka paralok jong ka Lakshmi ka Sadashiva Magadum. La rah ruh ïa u kurim jong ka Dilshad sha phatok ban tohkit.
