Shillong, K’lyngkot 21
Ka lahduh ka jong ka aïom ba la dep, ka Mawlai SC ka la pynkut ïa ka wat ba nyngkong jong ka Shillong Premier League 2024 da ka jingjop ïa ka Sawmer SC da 2-1 ha ka Sngi Ba-ar ha SSA Stadium kaba ha First Ground, Polo.
Kane ka la wan urlong lyngba u Damanbhalang Chyne (42) bad u Robertson Khongriah (83), katba u Hilford Lyngkhei (48) u la lah ban pynphai na ka bynta ka Sawmer.
Kane ka dei ka jingïalehkai kaba khatduh jong ka wat ba nyngkong bad hadien 45 tylli ki jingïalehkai jong man la ki klob kiba la ïoh ban ïalehkai mar khyndai sien.
Ka Mawlai kaba la ïoh jingjop ha man la ki jingïakhun, ka la khmih lynti ban rah biang ïa ka nam lahduh ha ka sien ba lai. Kumba ka paw dei tang ma ka kaba khlem shah rem ryngkat 25 poiñ hadien ba ka la jop phra bad ïakhaid shisien. Ha ka kyrdan ba-ar la ïoh da ka Shillong Lajong FC ryngkat 22 poiñ bad ha ka Lah Sngi U Blei ka la jop ïa ka Nongthymmai SC da 6-1 kol ha kaba u Babysunday Marngar u la ïoh ïa ka hat-trick. Ha ka kyrdan balai la bud sa ka Rangdajied United FC ryngkat 19 poiñ. Katba ka Nongthymmai SC bad ka Ryntih FC ki don sha trai bad ap jingma ban shah pynhiar kyrdan.
Ha kane ka jingïakhun, ka Sawmer ka la pyrshang ban ïakhun tyngeh bad ka la buh jingeh ïa ka Mawlai ban ïoh thep kol. Hynrei hapdeng kane ka jingïakhun ka Mawlai ka la ïoh ban pynkhih jar ha ka minit kaba 42 lyngba u Damanbhalang ha kaba u rangapkol ka Sawmer u Freddy Albert Pathaw um shym la lah ban kyrda na ka jingshah thep kol.
Hadien lai minit ba la bteng biang ïa ka jingïakhun jong ka kylla miet, ka Sawmer ka la lah ban pynïakhaid kylla lyngba u Hilford Lyngkhei. Une u rangïalehkai u la ïoh biang ïa ka kabu ksiar, hynrei u la shah khanglad noh ha u rangapkol ka Mawlai u Lambhamiki Lamare.
Ha shwa ban wai artat ka por ka Mawlai ka la pynbud biang sa shi kol lyngba u Robertson na ka bynta ban ïoh jingjop shisyndon.
Ka wat ba ar kan sdang naduh ka Sngi Balang ha kaba ka Nangkiew Irat SC kan ïakynduh pyrshah ïa ka Rangdajied ha ka por 11 baje mynstep bad ka Nongrim Hills SC ïa ka Langsning FC ha ka por 2:30 nohphai sngi.
