Agartala, Kyllalyngkot:
U Myntri Rangbah ka jylla Tripura u Dr. Manik Saha ha ka lah sngi U Blei u la ban jur ïa ka jingïatreilang ban ïakhun pyrshah ïa ka jingdih drok ha Tripura, da kaba kular ban pynlong ïa kane ka jylla kum ka “Nesha Mukta Tripura” (Drug-Free Tripura).
U la pynbna ïa ki jingthmu ban seng ïa ki jaka ban ïarap ha ka ban ïakhun ïa u drok haman la ki distrik, sdang na ka jaka ba nyngkong eh jong ka jylla kaba don 200 jingthiah ha Bishramganj ha Sepahijala distrik.
U Myntri Rangbah , u la leh ïa ka Bhoomi Puja na ka bynta ka jingplie ïa kane ka jaka, ha kaba kin kynthup ïa jaka jngi, leh yoga, bad ki prokram pynsngewthuh paidbah.
U Dr. Saha u la pynpaw ba ka la many ïa ka T.121.90 klur na ka bynta ban tei ïa ki jaka ban ïakhun pyrshah ïa ki jingkyrni dih ïa ki jingdih pynbuaid, kiba la shna khnang ban long kum ki jaka ai jingsumar na ka bynta ka jingpynbha ïa ki briew ba la ngop ha kylleng ka jylla.
Ha kane ka jingïalang, u Myntri Rangbah ka jylla u la plie ruh ïa ki maw nongrim na ka bynta ki katto katne tylli ki projek pynroi.
Kine ki kynthup ïa ka jingtei thymmai jong ka District Transport Office ha Amtali, ka surok na Bishramganj Bazar sha Chikancherra lyngba ka Barkurbari, ka ïing skul na ka bynta ka Latiacherra High School, ka Circuit House, bad kiwei pat ki kamra klas kiba don ki kynroh pud na ka bynta ka Charilam H/S School.
U Dr. Saha u la ai khublei ïa ka polisi bad jingthmu jong u Myntri Rangbahduh ka ri u Narendra Modi na ka bynta ka roi ka par, da kaba pynpaw biang ïa ka jingangnud jong ka sorkar ban kyntiew ïa ka jingsuk ha ka jingim jong ki paidbah ka Tripura.
“Shwa u snem 2018, ka Tripura ka la shah ktah ha ki kam sniew kiba mih na u drop. Hynrei naduh ba ka BJP ka la wan ha ka bor, ngi la shim ïa ki lad ki lynti kiba tyngeh ban ïakhun pyrshah ïa kane ka mat bad ngi la pynbna ïa ka thong jong ngi na ka bynta ka Tripura kaba lait na u drok,” u la pynpaw.
U la kyntu ïa ki skul, ki kolej, bad ki shnong ki thaw ban shim ïa ka bynta kaba radbah ban ithuh bad kyrshan ïa ki samla kiba la ngop ha u drok.
“Ka jingdih drok ka dei ka jingpang ha ka imlang-sahlang kaba donkam ïa ka jingïatreilang. Ki nonghikai, ki dkhot jong ka Club, bad ki nongïalam imlang-sahlang ki dei ban wan shakhmat ban weng ïa kane ka mat,” u la ong, da kaba kdew ba ka kolshor jong ka Club kaba thymmai jong ka jylla ka lah ban don ka bynta kaba kongsan ha kaba ïakhun ïa ka jingeh.
U Dr. Saha u la pynkynmaw biang ïa ka polisi jong ka sorkar ban ym shah ïa u drok bad u la khot ïa ki kontraktor ban pynthikna ba dei ban pyndep ïa ki projek ha ka por kaba biang.
Ka jaka sumar kaba don 200 tylli ki jingthiah ha Bishramganj kan long kum ka nuksa na ka bynta ki jaka kiba kum kine kiba la thmu ha kiwei pat ki distrik, kaba pyni ïa ka jingkut jingmut jong ka sorkar ban ai jingsumar bad jingpynbha pat ïa kito kiba shah ktah ha ka jingdih drok.
