Guwahati, Risaw:
Ki pulit ka Assam ki la kurup ïa ki jingdih buaid kiba la suba ba ki dei kiba shongdor kumba 13 klur tyngka bad ki la kem ïa san ngut ki briew ha ki ar tylli ki jingkhynra ba kyrpang, ong u Myntri Rangbah ka Jylla u Himanta Biswa Sarma ha ka 16 tarik u Risaw, da kaba pynskhem ba ki pulit ka jylla kim shym la “lehkai” ha ka jingpyntreikam pyrkhing jong ki ïa ka jingkhaïi drok.
Haba ïasam ïa ki jingtip ba bniah halor kane ka jingtreikam ha ki Social Media, u Sarma u la ïathuh ba ki pulit ka Guwahati ki la ïoh ban kurup 1.056 Kg ïa ki jingsuba ba dei ki jingdih buaid kiba shongdor T.8 klur tyngka bad ki la ïoh ban kem ïa arngut ki briew.
Ha ka jingkhynra kaba kyrpang, ki pulit ka Nagaon ki la kurup 1.023 kg u drok uba shongdor T.5 klur bad ki la kem sa lai ngut ki briew.
Haba pynkut ïa ki ar tylli ki jingkhynra, u Myntri Rangbah u la pynpaw ïa ka jingïoh kurup lang ïa u drok uba shongdor T.13 klur bad ka jingkem ïa sang ngut ki briew.
“Ka jaka kaba bakla, ka sngi kaba bakla, ka jylla kaba bakla ban don ha ka kam khaïi!” U Sarma u la thoh, da kaba ai khublei ïa ki kynhun pulit na ka bynta ka jingleh jong ki pyrshah ïa ki kynhun khaïi drok.Ki jingïoh kurup ki long shi bynta jong ka jingpyrshang ba dang ïaid shakhmat jong ka jylla ban tehlakam ïa ka jingkhaïi drok bad ban pynpra ïa ki kynhun kiba donkti ha ka khaïi drok be-aiñ.
