Aizawl, Kyllalyngkot:
Ki heh jong ka tnat Animal Husbandry and Veterinary jong ka Mizoram ki la ïathuh ba ka jylla kam shym la don kano-kano ka jingïap jong ki sniang na ka daw jong ka jingpang African Swine Fever (ASF) naduh u bnai Kyllalyngkot mynta u snem.
Hynrei ki la bynrap shuh shuh ba ka ASF haduh mynta ka la pynïap palat 62,000 tylli ki sniang naduh u bnai Lber 2021.
Ka jingshah ktah ha ka jingpang ASF ym lah ban leh kum kaba la teh lakam namar ba ka ju mih biang ynda la wan ka jingkylla jong ka jinglong ka suiñbneng kaba shit, ki la ong.
Ym duna ïa ka 14,950 tylli ki sniang ki la ïap namar ka ASF bad la pynkynriah ïa kumba 24,177 tylli ki sniang kum ka lad jingïada ban ïada na ka jingsaphriang jong ka jingpang sniang ha u snem 2024 kaba la wanrah ïa ka jingduhnong ha ka liang ka pisa kaba haduh palat 330 klur tyngka, la ïathuh ki heh sorkar.
Ka jingpang ASF ka la paw nyngkong eh ha ka shnong Lungsen ha south Mizoram Lunglei distrik hajan-khappud Bangladesh ha ka 21 tarik u Lber 2021, bad 33,417 tylli ki sniang ki la ïap bad 12,568 tylli ki sniang la pynkynriah jaka hapoh katei ka snem, ong ka tnat ba la buh jingkheiñ halor kane.
Katba 12,795 tylli ki sniang ki la ïap bad 11,686 tylli ki sniang ki la shah pynkynriah jaka ha u snem 2022, ha u snem 2023 la ïohi ba 1,139 tylli ki sniang ki la ïap bad 980 tylli ki sniang ki la shah pynkynriah jaka, ong ka jingthoh katkum ka jingbuh jingkheiñ.
Ki heh sorkar ki la ïathuh ba ka jingduhnong baroh ha ka liang ka pisa namar ka ASF naduh u snem 2021 la antad ba kan long lajan 900 klur tyngka.
Ka jylla Mizoram ka la shah ktah ruh ha ka jingpang Porcine Reproductive and Respiratory Syndrome (PRRS) ha ki snem 2013, 2016, 2018 bad 2020 kaba la pynïap da ki hajar tylli ki sniang bad ki khun sniang kaba la wanrah ïa ka jingduhnong kaba la kot sha ka T.10.62.
