
Agartala, Kyllalyngkot:
Ka jingïap jong ki briew na ka tyngkhuh rel ha Jalgaon ka la kiew sha ka 13 ngut naduh ba la jia kane ka jingjia ba sngewsih ha ka Sngi Balang.
Ha kane ka jingjia ki la don kumba 4 ngut napdeng 13 ngut ki briew kiba la ïap ha ka jingtyng-khuh ki rel ha Jalgaon, la ithuh ba ki dei kiba na Nepal, la ïathuh ki bor ba dei khmih hynnin ka sngi.
Uwei u khynnah uba dang rit ka rta bad 2 ngut ki longkmie ki dei napdeng ki 4 ngut ki nong Nepal kiba la ïap ha kane ka jingjia, ki la ïathuh.
Kumba la ïathuh ka tyllong khubor, la ong ba ki la don kumba 13 ngut ki briew ki la ïap bad 15 ngut ki la mynsaw hadien ba ki katto katne ngut ki nongleit jingleit jong ka rel Pushpak Express kaba leit sha Mumbai, ki la kynthih na ka rel hadien ba la don ka jingai dak jingmaham ban don ka jingjia tyngkhuh rel, ha kaba kine ki la shah ïuh ha ka rel Karnataka Express ha ki lynti ñaid ba marjan ha ka Jalgaon distrik jong ka Maharashtra ha ka janmiet jong ka Sngi Balang.
“Na kitei 13 ngut, ngi la ithuh ïa 8 tylli ki met ïap haduh mynta, kynthup ar tylli na ki Aadhaar Card jong ki”, la ong u Special Inspector General of Police u Dattatraya Karale ha ki lad phah khubor. Ki 8 ngut ba la ïap ki kynthup ïa 4 ngut kiba wan na Nepal, ong u Yuvraj Patil, uba long u ophisar ka tnat pathai khubor jong ka Jalgaon distrik.
Katkum ka thup ba la ai da ki bor ba dei khmih, kitei ki 4 ngut ki nong Nepal kiba la ïap ki dei kiba la tip kyrteng kum ka Kamala Navin Bhandari (43) ba sah ha Colaba ha Mumbai, Javakala Bhate (60) ba sah ha Bhiwandi ha Thane, Lachchiram Khataru Pasi (40) bad u Imtiyaz Ali (11).
Na kitei kiba mynsaw, ki don 10 ngut kiba dang shah sumar mynta- 9 ngut ha Pachora Civil Hospital bad uwei ha ka jaka sumar ha ka nongbah Jalgaon. Kiwei pat kiba la mynsaw malu mala la pyllait noh hadien ba la dep ai jingsumar, la ong u Patil.
Ka kynhun jong ki briew jong ka Central Railway ha ka miet jong ka Sngi Balang ka la leit jngoh ïa ki Hospital bad sam ïa ka jingïarap pisa sha baroh kaba long T. 2.70 lak sha ki 9 ngut ki nongleit jingleit kiba la mynsaw, ong u heh sorkar.
Kane ka jingjia aksiden ka la jia hapdeng ka jaka sangeh rel ha Maheji bad Pardhade hajan ka nongbah Pachora kaba don ha Jalgaon distrik jong ka Maharashtra ba Shatei-lam-Mihngi ha kaba ka Lucknow-Mumbai Pushpak Express ka la sangeh noh hadien ba la don ba tan ïa u kynjri ha ka por kumba 4.45 baje mynstep jong ka sngi Balang, ong ki heh jong ka Central Railway kham hashwa.
Ki la don kumba katto katne ngut ki nongleit jing-leit kiba don ha ka Pushpak Express, namar ka jingtieng ïa ka jingpluh ne jingbthei jong ka rel, ki la kynthih kynsan halor ka jingthmu jong ki ban lait im sha ki lynti ïaid ba marjan bad ki la shah ïuh noh ha ka rel Karnataka Express, kaba wan pyrshah, kaba leit na Bengaluru sha Delhi, ong ki heh pulit.
Ha kaba ïadei bad kane, u Dilip Kumar, uba long u Executive Director, ka Railway Board, u la kyntait ba dei ka jingbthei ne pluh ding hapoh ka rel, kaba la pynlong ïa ki nong-leit jingleit ban tan ïa ka Alarm.
Ha ka khubor ba la saphriang lyngba ka durkhih na Davos ha Switzerland, u Myntri Rangbah ka Maharashtra, u Devendra Fadnavis, ha ka sngi Balang, u la ong, “Ki la don kumba katto katne ngut ki nongleit jing-leit kiba don ha katei ka rel, kiba la sngewthuh bakla ïa ka tdem kaba mih na katei ka rel bad ki la rynsied kynsan namar ba ki la dap da ka jingsheptieng. Kaba sngewsih ka long ba ki la shah ïuh noh ha kawei pat ka rel.”
U Myntri Rangbah, u la pynbna da ka bailutksan kaba mar T. 5 lak sha ki bahaïing jong kine ki nongleit jingleit kiba la ïap ha kane ka jingjia kaba sngewsih.
Ka Railway Board ka la pynbna kyrpang ban ai jingïarap pisa kaba mar T. 5 lak sha ki bahaïing bahasem jong ki nongleit jingleit kiba la khlad noh ha ka jingjia ba sngewsih. bad mar T. 5,000 na ka bynta ki kito kiba la mynsaw malu-mala.