Jowai, K’lyngkot 24
Ka jingïalehkai phutbol final jong ki shynrang Under-17 bad kynthei (Women’s Senior) ha ka lympung 6th Meghalaya Games 2025 ka la khring ïa kiba bun bah ki nongpeitkai ban sakhi ïa ki sap ki phong bad ka jingtbit jong ki nongïalehkai hapoh ka madan Kiang Nangbah Stadium, Jowai ha ka 24 tarik Kylla-lyngkot hynnin ka sngi.
Ha ka final jong ki kynthei, ka East Khasi Hills ka la long ka lahduh da kaba pynrem ïa ka Ribhoi District da 1-0 kol. Ïa kane ka kol la thep da ka Ïaraplang Nongrum (35+5).
Katba ha ka liang ki shynrang, ka Ribhoi District ka la long ka lahduh da kaba pynliem ïa ka West Jaiñtia Hills District da 1-0 kol. Ïa kane ka kol la thep da u Newbirthson Sankli (8).
Ïa ki khusnam la sam da u Myntri ka tnad Sports & Youth Affairs ka sorkar Jylla ha ka jingdonlang u Cliff Nongrum Vice President ka MFA, u John Kharshiïing President MSOA, ki dkhot ka WJDSA nalor kiwei.
La sam ruh ïa ka khusnam ‘Best Athlete’ ha ka liang jong ki kynthei ba la ïoh da ka Sanfida Nongrum na East Khasi Hills, katba ha ka liang ki shynrang la ïoh da u Defender Sylliang na Ri-Bhoi District.
Ha ka jingïakhun kyrdan ba lai jong ki kynthei la jop da ka South West Khasi Hills District pyrshah ïa ka West Jaiñtia Hills District da 1-0 kol. Katba ha ki shynrang la jop da ka West Jaiñtia Hills District pyrshah ïa ka South West Khasi Hills da 7-2 kol.
