Guwahati, Kyllalyngkot:
U nongïalam ka seng Congress jong ka Assam, u Ripun Bora, u la ong ba ïa ka mang tyngka ka jylla jong u snem 2024-25, kum ka ‘jingmang kaba bakla’ jong ka sorkar BJP, da kaba kynthoh halor ka jingbym don ka jingmang pisa kaba biang.
Haba kren ha ka jingïalang bad ki nongthoh khubor ha Guwahati Rajiv Bhawan ha ka 22 tarik u Kyllalyngkot, une u nongïalam ka Congress u la kdew ba ka mang tyngka kaba kit ïa ka jingpynlut baroh kaba T.1,43,606 klur ka shaniah ha ka pisa bad ki ram na ka sorkar kmie, ha kaba la khmih lynti ba kan poi haduh T. 97,444 klur na kine ki tyllong.
U la kynthoh ïa ka jingshaniah jong ka mang tyngka ha ka jingïarap jong ka sorkar kmie da kaba ong ba ka pynmih ïa ka jingartatien ïa ka jinglong laitluid ha ka liang ka pisa tyngka jong ka jylla.
U Bora u la kdew shuh shuh ïa ki katto katne ki bynta kiba kongsan, kynthup ïa ka jingpynbiang um dih, ka jingbishar hok ha ka imlang-sahlang, ka ïing ka sem, bad ki kam jong ki riewlum trai ri-trai muluk, ha kaba ka mang tyngka ka la pyni ïa ka jingduna kaba haduh katta katta. U la kdew ba ki bynta kum ka um dih, ka ïing, bad ka jingbishar hok ha ka imlang-sahlang ki la mad ïa ka jingpyndonkam duna ïa ka pisa ba la mang, ha kaba don ki jaka kiba pyni ba haduh 51 percent ka pisa ka dang sah khlem pynlut.
U la kren ha ka jingïalang bad ki nongthoh khubor ha Guwahati Rajiv Bhawan ha katei ka sngi ha kaba ïadei bad ki jingkular lamler jong ka BJP ha ka mang tyngka jong ka Assam 2024-25.
Shuh shuh, u la kynthoh ïa ka jingbym lah ban ïaid shaphrang ha ki jingthmu pynroi kiba kongsan kiba la kular ha ka mang tyngka, kum ka jingkyntiew ïa ki nongrep sha kiba rit, ka jingpyndonkam ïa ki machine ha ki jaka rep bad ka jingkylla ha ka Digital. U Bora u la kynnoh ba ka sorkar BJP ka la wanrah ïa ka mang tyngka kaba duna ka jingtreikam kaba thikna bad kaba khlem lah ban pynbeit ïa ki jingdonkam ba shisha jong ki paidbah.
