New Delhi, Kyllalyngkot:
Katkum ka jingkheiñ jong ka Indian Meteorological Department (IMD) la ong ba ka lyer ha ka nongbah Delhi ka la kham khuid hadien ba ka la don ka jinghap slap, hynrei kumba la pynshisha la ong ba ka dang don hapdeng ka jingthew ba ka lyer ka dang jaboh kumba ka long ha ka sngi Thohdieng.
Ha shwa kane, ka tnat IMC ka la buh jingmaham ha kaba ïadei bad ki jinglong jong ka suiñbneng, ha kaba ka la ong ba kan sa don ka jinghap jong u slap ryngkat bad ki jingtied pyrthat.
Ka jingshit jingkhriat ba la ïoh jingtip ha ka por 8.30 baje mynstep jong kane ka sngi ka long haduh 98 percent.
Katba ka jinglong ka lyer ka dang sah ha ka kyrdan kaba ‘sniew’, ha kaba ka Air Quality Index ka long 262 ha ka por 9 baje mynstep, ong ka Central Pollution Control Board.
Ka jingshit jingkhriat ka neh 24 Degrees Celsius, katkum ka jingong ka IMD.
Ka AQI hapdeng ka zero bad 50 la kheiñ ba ka long kaba “bha”, 51 bad 100 “kaba biang”, 101 bad 200 “ba pdeng”, 201 bad 300 “ba jaboh”, 301 bad 400 “ba kham jaboh” bad 401 bad 500 ba jur bha ka jingjaboh.
Ka jingdum jong ka suiñbneng ka la pynthut ïa ka jingleit jingwan jong ki rel bad ki liengsuiñ ha Delhi ha ka Sngi Balang. Ki katto katne ki liengsuiñ ha ka kad liengsuin Indira Gandhi ki la sahteng namar ka jingdum lyoh.
Ki khyndai tylli ki rel kiba mih na ki jaka sangeh rel bapher bapher sha Delhi ki la hap ban mih slem.
Ki rel kiba ïaid slem ki kynthup ïa ka Brahmaputra Mail (15658), Poorva Express (12303), Purushottam Express (12801), bad ka GCT ANVT SF EXP (22433).
Katkum ka jingkheiï jong ka (IMD), la lap ïa ki jinglong jingman jong ka lyer ha ki bynta jong ka North Uttar Pradesh, Bihar, West Bengal, bad ki jaka ha ka thaiñ Shatei-lam-Mihngi.
Ka Delhi ha kane ka sngi ka don ïa ka jingshit jingkhriat kaba 10.4 Degrees Celsius ha ka por 5.30 mynstep. Kiwei pat ki thaiñ kiba don ha ka bynta ba shaphang Shatei ki la shah ktah lang na ka jingkahdum jong u lyoh ha ka por mynstep.
La ïohi ïa u lyoh uba rben uba la tap ïa ka sorbah Ayodhya, Uttar Pradesh ha kane ka step. Katkum ka jingïathuh jong ka IMD, la ong ba ka jingshit jingkhriat kaba rit eh kaba la antad ha Ayodhya ha kane ka sngi ka long 11 Degree Celsius.
Ha kajuh ka por, hapdeng ka jinglong jingman jong ka jingkhriat, da ki hajar ngut ki paidbah ki la ïalum ha ki rudwah jong ka Sangam ban leit ngam ha ka um kyntang ha ka Triveni Sangam, ka jaka ba kyntang ba ïakynduh ki lai tylli ki wah-ka Ganga, ka Yamuna bad ka Saraswati.
