D H Kharkongor
Ki don 3 (lai) tylli ki khubor jong ka taiew kaba dang shu dep, kiba kham shon jingmut. Kaba nyngkong ka dei ka huri-hura hapdeng ki nongshongshnong jong ka Mawkynrew bad ki bor jong ka Aiñ, na ka daw jong kata ka Skul RKM. Kaba ar ka dei ka jingthmu jong ka Sorkar pdeng ban shu pynduh pyndam beit noh ïa ka ‘Meghalaya Rail Project’. Kaba lai ka dei ka rai jong kata ka Mawlai Town Dorbar (MTD), kaba ïadei bad kane ka MDC election 2025. Ki khubor kiba pynbor ïa uba bun ba un ïa sei pynpaw ïa la ki jong ki nia ki jutang, kiba katkum la ka jong ka bor sngewthuh. Te kumta katba kiwei ki pynksan ïa kawei ka liang ba kita kiwei pat ki pynksan ïa kata kawei pat ka liang.
ïa ka jingïapher jingmut, ym lah lait. La hangno-hangno bad hapdeng jongnojongno ruh ka jingïapher jingmut kan don beit. Ka ju mih ruh tang na ka daw jong ka jingïapher than eh ka bor sngewthuh. ïapher ka bor sngewthuh ynda haba jingïapher ha ka rukom pyrkhat pyrdaiñ. Kaba katno tam ynda haba uba khambun napdeng u paid u dei u bym tip shai kaei kaba dei bad kaei kaba lait. Shitom ruh de ban pynsngewthuh ïa kiba nalor ba ki da ‘bthih’ than eh ki da ‘kab”kab’ pat ruh kum ka Tyngab. Ynda kumta ba ym lait ban hap ban shim pynban da ka rai kaba tang ban pynhun pynban ïa ki ‘Tyngab’, ki bym tip thikna kaei kaba dei bad kaei kaba lait. Te kumta ñiar ban lah ban shim ïa kano kano ka rai ka ban pynhunlang ïa baroh.
Ym baroh u rangbah u dei uba da Rangbah Shisha. Ym duh pat ruh uba kot shaduh ka jinglong tymmen, khlem da Rangbah. U bym lah ban sngewthuh ïa la ka jong ka dor kaba shisha um dei u Rangbah. Um dei u Rangbah wei ba um sngewthuh ban it ban wad lem ruh ïa la ki jong ki jingduna. Uba kum uta un nym kubur hi ruh wat ïa la ki jong ki jingbakla. Uba kum uta um pdiang ba ki don kiba kham tip, kham shemphang bad kham lah ban ïa u. ñiuma, u lah ban dei u ‘Nongïalam’ ne u ‘Nongsharai’ ne ka ‘Bor’ tangba ïa ka dor kaba shisha ka jong u la ithuh shai tang na ki nongbud ki jong u. Namar ka jingbym long Rangbah ba un nym sngewthuh ba kum u ‘Nongïalam’ ne ‘Nongsharai’ u dei ban saiñdur lem ïa kiba kham hadien ba kin long ki ‘Nongïalam’ ne ki ‘Nongsharai, kiba da dei shisha kat ki ‘Nongïalam’ ne ‘Nongsharai’. U ‘Nongïalam’ ne ‘Nongsharai’, u bym shym la Rangbah, un nym kwah ban aiti noh ïa ka jinglong ‘Nongïalam’ ne ‘Nongsharai’ ha kiwei pat, wat haduh ka jingring mynsiem kaba khadduh ka jong u.
Ki ‘Sniang’ ki sngewtynnad ban ïa kyrsum ktieh, wei haba la pynjuh pynjem ïa ki ha ka ktieh. Kiba kum kita ki jait ‘Sniang’ kin pynshoi, da kumne kumtai, wat ïa u Rangbah ba shisha ba un hiar ha ka ahor ka jong ki, na ka bynta ban ïa kyrsum ktieh lang bad ki. Pynban u Rangbah uba shisha un nym ngoplor kat ban pynhiar dor ïalade da kaba ïa kyrsum ktieh lem bad ki. Un nym ïa kawangktieh markylliang bad kita ki Sniang. Ym lait ba wat ki ‘Ksew’ ruh kin ïa wiar ïa u Rangbah ba shisha.Tangba u Rangbah ba shisha un nym ïeng ne phaidien ban ïa wiar bad ki Ksew, tang namar ba ki wiar ïa u. U Rangbah um ju pynsngap ïa ka nia khlem nongrim jong ki khyllung ki khynnah ne jong ki ‘Tyngab’ lem bad ki ‘Phiang Rnong’, ba thylli. Kaba katno tam kat ban ïa tai ñia bad kiba kum ma ki. ïa ki dei ban shu phai beit da ka shkor kyllud. Jubab ïa ki da kaba shu kbum beit jak ïa la ka jong ka shyntur.
U Rangbah uba shisha u ïasyriem ïa u ‘Kbeit’ ne ïa u ‘Khlieng’. Bunsien u ‘Kbeit’ ne u ‘Khlieng’ u ju her marwei bad ruh jar jar. U da her ruh da kaba suk kham shalor sha kaba kiwei kim ju kham kynmaw sngi ban khmied ïa la ka khmat. Ka jingleh kaba imat kumba u da kyiar kypang ïa ki ‘Tyngab’. Ka jingkyiar kaba na ka bynta ka jingbha. U ‘Kbeit’ ne u ‘Khlieng,’ yn tang shu pynthut than eh ki ‘Tyngab’, u shu her beit suki jai kham shatei shalor sha kaba ki ‘Tyngab’ kim lah bor.
Hynrei kam long kumta bad ki ‘Tyngab’. Ki te ki sngewtynnad ban ïa her kynhun kynhun. Ki sngewtynnad ban da pyntip pyrthei hangno ki don. Ki da kum ‘kawkaw’ ne ‘bawbaw’ ruh baroh shisngi. Ki bapli ki Tyngab ki kwah ban da tip lut. La ïa kaei kaei ruh ki kwah beit ban ia don bynta lang ne ba ïa ki dei ban da kynthup lang. Kim lah khlem da padiah wat ïa kaba ym da donkam ïa ki wat tang ba kin shu saham ruh. Ki bapli ki ‘Tyngab’ kim lah khlem da tuklar ïa kaba kim dei ba kin tuklar than eh. ñiar ban iohi ne iohsngew ba ki ‘Kbeit’ ne ki ‘Khlieng’ kin ïa kawkaw bawbaw ne ba kin ïa shrut, hapdeng jong ki. Hynrei kam long kumta bad bapli ki ‘Tyngab’, kiba ithuhshai ba ki da sngewtynnad ruh ïa kaba ïewtung ne ïa kaba pyut. Ki dei ruh ki jingthaw kiba suk ban pynthame bad suk ruh ban pynshoi pynshad.
La hangno-hangno ruh ym duh ban don ki ‘Sniang’ (ïa muja kyrsum ktieh) lem bad ki ‘Tyngab’. Ki dei ki ‘Sniang’ bad ki ‘Tyngab kiba ju pynmih ïa ki kynrum ki kynram la hapoh ka Niam ne hapoh Shnong ne hapoh ka Seng Saiñ hima Sima. Ka long shisha kumta wei ba ki dei kiba suk ban pynsngewthuh bakla, kiba suk ruh ban pynshoi pynshad bad kiba da shlur biej shisha. Ka jubab kaba ‘Da Bha Tam’ ïa ki ka dei ka ‘jingkbum beit jak’, ïa la ka syntur’.
