Imphal, Kyllalyngkot:
Ha ka jingpyntreikam kaba wanrah ïa ka jingjop, ki shipai ka tnat Army, ha ryngkat bad ki shipai ka tnat Assam Rifles, ki pulit jong ka Manipur, bad kiwei kiwei ki bor pahara, ki la lah ban ïoh kurup ïa ki tiar bad ki jaka buh tiar thma kiba bun bha ha ki distrik bapher bapher jong ka Manipur.
Kine ki jingkhynra, kiba la thmu ïa ki thaiñ lum bad them, ki la pynlong ban ïoh kurup ïa 35 tylli ki tiar ïaleh, kynthup ïa ki tiar siat, ki kuli ïasiat, bad ki tiar pynbthei.
Ki jingleit khynra ki la sdang ha ka 19 tarik, Kyllalyngkot, 2025, da ka jingthmu kaba hashwa kaba la long ha ha ka lum Lungkhongjang, kaba don shaphang Shatei jong ka shnong Bungte Chiru ha Bishnupur distrik.
Kum shi bynta ban pyntreikam hadien ka jingïoh ïa ka jingtip kaba bniah, ka kynhun ka la lap ïa ka suloi Sniper ba la pynkylla dur, phra tylli ki suloi 9mm, ar tylli ki suloi ba don tang kawei ka ktang, ki bom, bad kiwei kiwei ki tiar hiar thma ba la buh ha kawei ka jakaka.
Ha ka 20 tarik Kyllalyngkot, 2025, kawei pat ka jingkhynra ha ki jaka khappud jong ki distrik Bishnupur bad Churachandpur ka la pynlong ïa ka jingïoh kurup ïa kawei ka suloi 9mm, kawei ka suloi .303, kawei ka pistol, kawei ka suloi Breach-Loaded kaba don tang kawei ka ktang, kawei ka suloi kaba la shna hapoh ka ri, ki bom kawang kti, bad shuh shuh ki song jong ki kuli ïasiat.
Ha Tengnoupal distrik, ki shipai Assam Rifles ki la pynthut ïa ka jingthmu ban rung tuh ha shi lynter ka khappud Indo-Myanmar, ha kaba ki la ïoh kem ïa uwei u briew uba donkti bad ka kynhun lehnoh Kanglei Yawol Kanna Lup (KYKL).
Ka jingleit khynra ba la pynlong hadien ba la ïoh jingtip na ki kynhun wad bniah ha ki distrik Noney bad Thoubal ki la pynlong ruh ban lap ïa ki tiar siat bapher bapher, ki bom kawang kti bad ki jaka ba la buh ïa kiba bun ki tiar hiar thma.
Ha ka 23 tarik , Kyllalyngkot, 2025, ka jingkhynra lang jong ki pulit ka Assam Rifles bad ki pulit ka Manipur ha ki thaiñ Thoubal bad Jiribam ka la pynlong ïa ki ban ïoh kurup ïa ki bom kawang kti, ki pistol, bad ki suloi.
Ka jingkhynra kaba kham bniah ha ki distrik kiba kynthup ha Chandel, Imphal West, bad Kakching ha ka 24 bad 25 tarik u, Kyllalyngkot, ka la pynlong ban lap shuh shuh ïa ki tiar siat, kynthup ïa kawei ka suloi kaba lah ban thep hi dalade, ka suloi Carbine Machine Gun, bad ki bom Improvised Explosive Devices (IED).
Ïa ki briew kiba la shah kem, ryngkat bad ki tiar ïaleh ba la ïoh kurup bad ki jaka buh tiar hiar thma, la aiti noh sha ki pulit ka Manipur.
Ka jingleit khynra ba la ïatreilang hapdeng ki shipai India, ki shipai Assam Rifles, bad ki bor pynjari aiñ ha ka thaiñ ka pynpaw ïa ka jingangnud jong ki ban pynthikna ïa ka jingshngaiñ ha ka thaiñ bad ban ïaleh pyrshah ïa ki jingma kiba nang kiew kiba la wanrah da ki kynhun pyntriem ha kane ka thaiñ.
