Jaipur, Kyllalyngkot:
Ki pulit jong ka Jaipur, ki la kem ïa 500 ngut ki briew, ba kynthup ïa ki Rohingya bad ki nong Bangladesh, ha ka jingkhynra kaba jur kaba la long ha ka Lah Sngi U Blei halor ka jingthmu ban ïaleh pyrshah ïa ka jingbuhai shnong beaiñ bad ki nongleh kam sniew kiba shyrkhei.
Katkum ka jingong u Police Commissioner ka Jaipur u Biju George Joseph, kane ka jingpyntreikam ka long halor ka jingthmu ban tehlakam ïa ki kam runar bad ban ithuh ïa ki briew kiba sah beaiñ ha kane ka nongbah.
Na kitei kiba la shah kem, la ïathuh ba 394 ngut ki dei ki phetwir Rohingya, katba kiwei pat ki kynthup ïa katto-katne ngut ki nong Bangladesh.
“Ki Pulit ka Jaipur ki la sdang ïa ka jingpyntreikam ban kem ïa ki nongleh kam sniew kiba jyllei ha kylleng ki jaka jong ki jaka treikam jong ki pulit kiba hap hapoh ka Commissionerate,” ong u Joseph bad bynrap ba kito kiba shah kem kin shah tohkit bad ngat ha ki kti jong ka aiñ.
Ka mat ïakren ha kaba ïadei bad ki nong Bangladesh kiba wan rung be-aiñ sha India bad kiba sah be-aiñ ha kane ka Ri, ka la paw pyrthei bha hadien ba ki pulit ki la kem ïa u Shariful Islam Shehzad Mohammad Rohilla Amin Fakir, uba dei u nong Bangladesh, uba la 30 snem ka rta, halor ka jingthombor da ka tari ïa u khlur ak phlim u Saif Ali Khan ha Mumbai.
Ha kajuh ka por, ka sorkar Maharashtra dang shen ka la thaw ïa ka kynhun SIT ban tohkit halor ka jingai ïa ki syrnot kha bad ïap halor ki aplikeshon “ba la pynslem” hapdeng ki jing-ujor jong ki nongwan buhai shnong beaiñ na Bangladesh kiba sah ha ki bynta jong ka jylla, la ong uwei u heh sorkar.
