Wahïajer, K’lyngkot 29
U khlur ïalehkai phutbol barim ka Jylla, Marlangki Suting, u la pynpaw ïa ka jingkhmih lynti ba ka thaiñ Wahïajer kan lah ban sei bad pynmih ïa ki nongïalehkai kiba kynsai ha ki snem ki ban wan lyngba ka jingdon ïa ka madan ïalehkai kaba kynsai ïa kaba la tip kum ka Wahïajer Multipurpose Sports Complex.
Ïa katei ka complex la tei ha ka jinglut kaba la kot sha ka T. 25 klur tyngka. Na ka liang ka Sorkar Jylla ka la plie ïa kane madan mynshem snem da u Myntri Rangbah ka jylla u Conrad K Sangma. Kumta kane ka madan ka la long shisha ka jingmyntoi kaba khraw na ka bynta ki nongïalehkai jong katei ka thaiñ.
Haba pynpaw sha ki lad pathai khubor hadien ba la kut ka jingïalehkai semi final kaba ar jong ka Meghalaya State League 2024 ba la pynïaid da ka Meghalaya Football Asso-ciation, u Marlangki uba long u coach ka Rymbai Shkenshynriah SC u la ong, “Ki khynnah ha kine ki por kiba mynta ki la ïoh ïa ki madan ïalehkai kiba paka bad ym kum ha ki por jong ngi mynshwa ha kaba ngi hap ban ïalehkai ha ki madan maw kiba khohruh-khohram. Te kumta ki dei ban pyndonkam hok ïa la ki sap ïalehkai ba kyrpang jong ki.”
Nalor kane, u la pynpaw ka jingkhmih lynti ba kum ki bor pynïaid ïa ki lympung ïalehkai ba ki dei ban shim khia ha ka ban ailad ïa ki khynnah kiba don ïa ki sap ïalehkai ba kyrpang khnang ba kin kiew shaphrang ha ki kam ïalehkai jong ki.
Shuh shuh u la pynshlur ïa ki rangïalehkai ba kim dei ban long kiba sngew sarong ne don ïa ka mynsiem hangamei haba ki don ha ki klob kiba heh, hynrei ki dei ban angnud ba kin nangtrei shitom ba kin nangïai kiew shaphrang khnang ba kin ïoh ban mihkhmat ïa ka ri India ha ki lympung ïalehkai shabar ri.
“Ha ka por ba nga dangrit nga don ïa ka jingthrang bad ka jingangnud ban long kum ki rangïalehkai ba kynsai kum u Bah Richard Nengnong bad Augustar Kharkongor, hynrei hadien ba nga la ïoh ban ïalehkai ha kiwei pat ki klob shabar jylla nga don pat ïa ka jingangnud ban long kum u khlur ïalehkai u Bhaichung Bhutia bad lyngba ka jingtrei shitom nga nangsan ha ka kam ïalehkai. Te kumta kum ki rangïalehkai ki dei ban don ïa ka mynsiem trei shitom ha ki jingmut jingpyrkhat jong ki khnang ba kin nangkiew shaphrang bad ban poi sha ka thong.”
