Nongstoiñ, K’lyngkot 30
Ka samla Ibahundaris Kharsyiem-lieh kaba dei ka khun khatduh jong u Bah Phorest Khardum bad i Kong Estina Kharsyiemlieh na ka shnong Marang (Jaidoh), West Khasi Hills ka la ïohpdiang ïa ka 1st Dan Black Belt bad ban long ka kynthei kaba nyngkong eh na ka Jylla ban ïoh ïa kane ka nam, bad mynta ka la long ka nonghikai (master) ha ka Jylla hapoh ka All Meghalaya Kickbox-ing Association.
Na ka liang ka AMKA ka la pynkut burom ïa katei ka samla ha ka Sngi Palei ha Mecofed Hall New Nongstoiñ, West Khasi Hills .
Ha kane ka sngi pynkup burom ïa kane ka samla, la pynïaid da u President ka AMKA Bah Samuel Hashah uba la pynsngew ruh ïa ka khana lyngkot jong ka jingïaid lynti jong ka samla Ibahundaris bad uba la aiti ruh ïa ka Affiliation Certificate sha ka WKH Kickboxing Association, ha ka jingdonlang ruh ka Kong Balarina Syiem, District Sports Officer kum ka kongsan kaba la shim ruh ïa ka bynta ban pynkup burom ïa ka samla Ibahundaris, ha ka jingdonlang ruh u DFO,WKH, kmie-kpa jong kane ka samla, u sordar Shnong ka Shnong Marang Jaidoh, ki ‘riew rangbah bad kiwei kiwei.
Shuh shuh ha katei ka sngi, nalor ka jingpynkup burom ïa katei ka samla Ibahundaris, na ka liang jong ka AMKA ka la ïoh ruh ban pynkup burom ïa ki kmie ki kpa jong katei ka samla bad ïa kiwei pat kiba ïadonlang.
Nangta, ha kane ka sngi la ïoh ruh ïa ka pyni ïa ka rukom ïalehkai na ki khynnah ïalehkai jong ka AMKA kiba la ïoh ruh ban khur ïa ki khusnam ha ka lympung National Championships 2024-25 kaba la long ha nongbah Kerela.
