New Delhi, Rymphang:
Ha shwa ban wanrah ïa ka mang tyngka jong ka sorkar pdeng 2025, ka Myntri ka tnat pla tyngka Nirmala Sitharaman ka la ïakynduh ïa ka President Droupadi Murmu ha Rashtrapati Bhavan.
Ka Mang Tyngka kan batai ïa ki polisi ba kongsan ha ka liang ka pisa tyngka, ki jingpynkylla ïa ka khajna, bad ki jingthmu ban kiew ka ïoh ka kot, ha kaba ka Economic Survey kan antad ïa ka jingkiew hapdeng 6.3-6.8 percent na ka bynta u snem mang tyngka 2026.
Shwa ban wanrah ïa ka mang tyngka jong ka sorkar pdeng 2025 kaba la khmih lynti bha, ka Myntri ka pla tyngka ha ryngkat ka jingsynran lang u Myntri ka tnat pla tyngka jong ka sorkar jylla u Pankaj Chaudhary, kila ïakynduh ïa ka President ka Droupadi Murmu ha Rashtrapati Bhavan ha kane ka sngi Saitjain.
Ha kane ka jingïakynduh la ïohi ïa ka Myntri pla tyngka ba ka dang ïakren ïa ki jingthmu ba khatduh jong ki jingtyrwa mang tyngka bad ka President.
Hadien kane ka jingïakynduh la buh por ba ka Sitharaman kan leit sha ka jingïalang jong ka kynhun Myntri ban pynskhem ïa ka mang tyngka shwa ban rah sha ka Parliament.
Kan ai ïa ka jingkren mang tyngka kaba phra sien lynter ha ka por 11 baje mynstep ha Lok Sabha. Kane ka Mang Tyngka la khmih lynti ba kan batai ïa ki polisi mang tyngka jong ka sorkar, ki jingtyrwa khajna bad jingpynlut, ki jingpynkylla ha ka khajna, bad kiwei kiwei ki jingpynbna kiba kongsan, da kaba pynleit jingmut ha kaba pynkhih ïa ka jingroi ka ïoh ka kot bad ban pynkhlaiñ ïa ka jinglong jingman ha ka liang ka pisa tyngka jong ka ri.
Katkum ka jingïathuh jong ka tyllong khubor, la ong, ka Economic Survey ba la wanrah ha Parliament ha ka Sngi Thohdieng ka antad ba ka ïoh ka kot jong ka ri India kan kiew hapdeng 6.3 percent bad 6.8 percent na ka bynta u snem mang tyngka ban wan, FY26.
Ka jingwad bniah ka la pynpaw ïa ka jingbteng ban khlaiñ jong ki nong-rim jong ka ïoh ka kot jong ka ri, kiba la kyrshan da ka jingkheiñ jingdiah kaba skhem nabar, ka jingpynskhem ïa ka pisa kaba dang ïaid shakhmat, bad ka jingpyndonkam shimet kaba khlaiñ.
Ka jingwad bniah ka la pynksan ruh ba ka sorkar ka thrang ban pynkhlaiñ ïa ka jingroi jong ki karkhana ha ka por bajrong da kaba pynleit jingmut ha ki bynta kiba kongsan kum ka jingwad bniah bad jingpynroi (R&D), ki karkhana rit, bad pdeng (MSMEs), bad ki marbam mardih. Kine ki sienjam ki thmu ban kyntiew ïa ka jingmih kaba kham bun, ka jingpynmih jingmut thymmai, bad ban pynbha ïa ka jinglah ban treikam jong ka India ha ka pyrthei ha ki bynta bapher bapher.
