New Delhi, Jylliew:
Ka sorkar Delhi ka la rai ban pynbun ïa ka jingïarap shuh shuh ba la ai na ka bynta ka jingduhnong jong ki jingthung jingtep, kaba la wanrah ïa ka jingsuk kaba khraw ïa ki nongrep.
Katkum ka jingong ka Myntri Rangbah ka jylla ka Rekha Gupta, la ai jingmynjur ban ai jingïarap pisa da T. 75 hajar shi hectare sha ki nongrep kiba shah ktah na ka jingjur u slap bad ka jingshlei um ha ki lyngkha rep hapoh u bnai Nailar-Nailur, 2025.
Ka Myntri Rangbah la la ong ba kane ka sienjam kan ai jingmyntoi beit beit ïa kumba 10,000 ngut ki nongrep ha ka nongbah kiba ki jingthung jingtep jong ki ki la shah ktah jur namar ka jingjur slap kaba bteng ha u snem ba la dep bad ka jingtuid um ha ki lyngkha namar ka jingtuid ki nala um ba kynja mariang.
Ka la pynpaw shuh shuh ba ka jaka rep baroh kaba long 10,977.44 akar ka la shah ktah na ki jingthombor jong ki bor ka mariang.
Ha u snem 2015 ka sorkar ha kata ka por ka la buh ïa ka kyndon ban ai jingïarap ha ka dor kaba T.20,000 shi acre lada jia ba ki jingthung ki duh namar ka jinghap slap. Kane ka pisa ka long kumba T. 49,421 shi hectare.
Mynta, da kaba pyrkhat ïa ka jingkiew jong ka jinglut jingsep ha ka rep ka riang ha ka por kaba palat shi snem, ka sorkar kaba mynta ka la pynkiew ïa ka dor jingïarap sha ka 75 hajar tyngka shi hectare. Kumta ki nongrep kin ïoh ïa ka jingïarap kaba kham heh shibun ban ïa kaba mynshuwa.
Katkum ka jingong ka Myntri Rangbah, ïa kane ka jingïarap yn ai sha ki trai jaka ba la rekod. Ki jaka ba dei trai da ki kompeni, ki jaka ba la buh ha ki Gram Sabha, bad ki jaka rep ba la ker da ki kynroh pud ba neh kin ym shah ktah hapoh kane ka jingïarap.
Ka la ong ba ka jingbishar bniah kaba la leh da ka tnad khajna ka la lap ba ki jingthung ki la mad ïa ka jingshah pynjulor kaba jur, bad la kheiñ ïa ka jingduhnong jong ki jingthung haduh 100%.
Halor kane, ka kynhun myntri ka la rai ban ai jingïarap ha ka dor ba pura kaba long T. 75,000 shi hectare sha ki nongrep kiba shah ktah. Hapoh ka jingpynbeit kaba kham mynshuwa, la ai jingïarap katkum ka jingduhnong jong ki jingthung haduh 70%.
Ka Gupta u la ong ba ka sorkar ka buh jingmut bha ïa ka jingtrei shitom jong ki nongrep, ka jingim bad ka jingshngaiñ ha ka rep ka riang.
Haba ki jingthung jingtep ki shah ktah namar ka jingshah lynshop ha ka mariang, ka jingjur palat u slap ne kiwei kiwei ki jingjia kiba sniew, ka dei ka kamram jong ka sorkar ban ïeng skhem bad ki nongrep bad ban ai jingïarap pisa ha ka por kaba biang.
