Shillong, Rymphang 03
Ka Elite Xl bad ka Momentum ki la jam sha ka quarter final ha ka Third Division Shillong Cricket League 2024-25 ba la pynïaid da ka Shillong Cricket Association hadien ba ki la ïoh jingjop ha ka Lah Sngi U Blei.
Ha kane ka jingïakhun pre-quarter final, ka Elite Xl ka la pynliem noh ïa ka Mawjam CC da 6 wiket. Ka Mawjam kaba la kam trai ban tied nyngkong ka la ïoh 115 run bad shah pynkhyllem 10 wiket ha ki 20 over. U Sahil Gurung u la tied 32 run na ki 21 bol bad u Rahul Chettri u la ïoh 22 run na ki 22 bol. Katba u Arkadipta Choudhary u la shim 3 wiket na ka Elite.
Haba wan shimti ïa ka pali ba ar, ka Elite Xl ka la lah ban kynjoh sha ka thong da kaba ïoh 117 run bad shah pynhap 4 wiket ha ki 13.1 over. U Arup Das u la tied 26 run na ki 22 bol. Katba u Sahil Gurung u la shim 3 wiket na ka bynta ka Mawjam. Ïa ka nam ‘Player of the Match’ la ïohpdiang da u Arup Das.
Haba phai sha kawei pat ka jingïakhun pre-quarter final ba ar, ka Momentum ka la jop da 102 run ïa ka Young Fighters. Ka Momentum kaba la shimti shwa ban tied nyngkong, ka la ïoh 201 run bad shah pynhap 8 wiket na ki 20 over. U Pritam Singh u la tied 38 run na ki 25 bol bad u Lucas Wahlang u la ïoh 30 run na ki 19 bol. Katba u Indramani u la shim 2 wiket na ka bynta ka Young Fighters.
Haba wan beh ïa ka thong, ki nongtied ka Young Fighters ki la shah pynkhyllem baroh na ka bynta ban ïoh tang 99 run ha ki 13.5 over. U Pankaj Kr Rai u la tied 21 run na ki 10 bol. Katba u Hemanta Chettri u la shim 3 wiket bad 2 wiket da u Hamid Sohtum na ka bynta ka Momentum. Ïa ka nam ‘Player of the Match’ la ïohpdiang da u Hemanta Chettri.
