
Gangtok, Rymphang:
U President bathymmai ka seng BJP ha Sikkim u DR Thapa ha ka 1 tarik, Rymphang, u la ong ba ka BJP kan trei ban pynkhlaiñ ïa ka seng ha kane ka jylla.
Haba kren kyrpang bad ka lad pathai khubor, u la ong ba ka long kaba kongsan ïa ka seng ban trei halor ka jingkiew ha ka seng bad ban pynsngewthuh shaphang ki skhim sorkar pdeng.
U la ïeng skhem ruh ban pyrshah ïa ka projek pynmih bording Teesta III, da kaba kdew ïa ka jingktah jong ka ïa ka mariang bad ïa ka imlang-sahlang.
U Thapa u la kam ba hadien ka ilekshon ba la dep, ka seng ka la pynlong ïa ka jingpeit bniah ïalade bad ka la lap ïa ki jingduna ha ka rukom pynïaid seng jong ka.
“Ngi la sngewthuh ba ka seng jong ngi kam da khlaiñ than. Ha kine ki 8 bnai ba la dep, ngi la trei ban pynkhlaiñ ïa ka. Ka jingthmu jong ngi ka long ban rah ïa baroh ki skhim pdeng sha ki paidbah bad ban pynsngewthuh ïa ki ïa ki jingmyntoi jong ki,” u la ong.
Haba kren ïa ki jingeh halor ka projek Teesta III, u Thapa u la pyrshah jur ïa ka jingbteng jong ka. “Ka jingpynjot kaba la wanrah da kane ka projek ka la long kaba shyrkhei. Haduh 70 ngut ki mynsiem briew ki la duh, 1,800 tylli ki ïing ki la shah pynjulor, bad kumba 80,000 ngut ki briew ki la shah ktah na ka jingshah pynjulor mynshem snem,” u la ong.
U la ban jur ïa ka jingdonkam ban don ka jingpeit bniah kaba biang ïa ka jingktah ïa ka mariang, kaba u la kam ba ym shym la pynlong ha ka rukom kaba biang.
“Dei na kane ka daw ba ka jingpynjot ka la jia ha ka sien kaba la dep. Nga kyrpad ba dei ban leh ïa ka jingbishar bniah kaba biang shwa ban shim ïa kino kino ki rai kiba kham bniah,” u la bynrap.
U Thapa u la kynthoh ruh halor ka rai jong ka Supreme Court kaba dang shen kaba ïadei bad ka jingdonkam jaka sah na ka bynta ban rung ha ki Medical College ha Chandigarh.
Ka rai kaba la pynshong nongrim ha ka kyndon kaba 14 jong ka riti synshar ka ri, ka la ailad ïa baroh ki nongaplai khlem da kheiñ ïa ka jylla kaba ki shong ki sah.
Haba kylli hato kane ka lah ban ktah ïa ka Sikkim, u Thapa u la pynshai ba ka Sikkim ka dei kaba la ïada hapoh ka Article 371F, kaba ai ïa ki kyndon riti synshar ba kyrpang ïa ka jylla.
“Ka nongrim jong ka Article 14 kan nym treikam ha Sikkim ha kajuh ka rukom namar ngi don ki jingïada ba kyrpang katkum ka Article 371F,” u la ong.
U Thapa u la pynthikna ba hapoh ka jingïalam jong u, ka BJP jong ka Sikkim kan pynleit jingmut ha ka jingïadei bad ki nongshong shnong bad ban pynbha ïa ka jingïadei bad ki paidbah.
“Ngi kwah ban pynthikna ba uwei pa uwei u nongshong shnong jong ka Sikkim un sngewthuh ïa ki jingmyntoi jong ki skhim sorkar pdeng bad un lah ban ïoh jingmyntoi na ki,” u la ong. U la ai jingmut ruh ïa ka plan kaba la buh ryntih ban pynïar ïa ka jingsynshar jong ka seng ha ka jylla, khamtam ha ki thaiñ nongkyndong.