Shillong, Rymphang 04
Ka lympung ïalehkai First Division Shillong Cricket League 2024-25 ka la nang jam shaphrang ha kaba ka Khalsa Warriors ka la ïoh jingjop da kaba pynliem ïa ka Sunrise da 2 run ha ka Sngi Ba-ar ha madan Polo.
Ha kane ka jingïakhun ka Khalsa Warriors ka la kam trai ban tied nyngkong ha kaba ka la ïoh 135 run bad shah pynkhyllem 10 wiket ha ki 34.2 over. U Jay Shankar Sah u la tied 24 run na 52 bol bad u Depanjy Lama u la ïoh 20 run na 18 bol. Katba u Baremdor Rynjah u la shim 4 wiket bad 2 wiket da u Krishna Chettri na ka bynta ka Sunrise.
Haba wan beh ïa ka thong ba la buh da ka liang pyrshah, ka Sunrise ka la ïoh 133 run bad shah pynkhyllem 10 wiket ha ki 35.4 over. U Krishna Chettri u la tied 33 run na 31 bol bad u Bishen Tamang u la ïoh 27 run na 40 bol. Katba u MD Siraj Ali u la shim 5 wiket bad 3 wiket da u Rahul Singh na ka bynta ka Khalsa Warriors. Ïa ka ‘Player of the Match’ la ïohpdiang da u MD Siraj.
