Shillong, Rymphang 04
Ka Jylla Meghalaya ka la wer ïa ki kompani kynshew kam shimet ba kin wan trei ïa ki project pynmih bording hapoh Jylla na ka bynta ban lah pyndap ïa ka jingkiew ka jingdawa bording.
Haba pyntip ïa kane, u Myntri ba khmih ïa ka tnat Bording (Power), AT Mondal u la ong ba ka Sorkar ka la pynmih jingpynbna ïa ka Power Policy ba thymmai, kaba pynshlur ïa ki nongpynmih bording shimet ba kin wan kynshew kam ha kane ka Jylla.
Ka jingkiew stet jong ka jingdonkam bording bad ka jingduna ki tyllong pynmih bording lane ki power project mynta la kumba 10 snem, ka la pynlong ïa ka Jylla ban ïakynduh jingeh ha ka ban pynbiang bording ha ki snem ban wan.
U Mondal u la ong ba ka jingdonkam bording ha ka Jylla ka la kiew haduh kumba 11 percent, kaba pynlong mynta ïa ka Jylla ban thaw lad bad pynkhreh ïa ki jingeh kiba lah ban mih hadien habud.
“Ngi hap ban pynkhreh lypa ban pyllait na ka jingkyrduh jong ka bording. Ym kiwei ki Jylla kiba lah ban thied ïa ka bording ha ka dor kaba rem, ka Meghalaya ka donkam ban pynleit jingmut ha ka jingpynmih bording na lade ban pyndap ïa ka jingdonkam”, la ong u Myntri.
Kumba ka long mynta, ka Meghalaya ka dang shaniah beit ha katto-katne tylli ki jaka pynmih bording, ba kynthup ïa ka Umïam, Umtrew, MLHEP, Ganol, bad Sonapani.
U Mondal u la ïathuh ruh ba ka Sorkar ka la aiti sha ka North Eastern Electric Power Corporation Limited (NEEPCO) 85 MW, ban pyntrei ïa ka hydroelectric power project ha ka thaiñ Shella-Mawsynram.
“Ka la don ka jingeh ha kaba ïadei bad ka jingshim jaka kaba la wanrah ka jingsahkut jong ka kam, ka jingpyrshang ka dang ïaid ban weng ïa ki jingeh”, u la ong.
Ban weng ïa ki jingeh na ka jingkyrduh bording, ka Sorkar Jylla ka dang pyrshang ban ïasoi ïa ki soskular (MoU) bad ki kompani seng kam kiba kwah ban trei ha ka kam pynmih bording.
“Ka Jylla kan ïohei 12% ka bording bad 1% kan leit sha ki kam pynroi ha ka thaiñ ba don ka projek. Namar ka jingnang kiew ka jingdawa bording ba kot haduh 11% ha ka shisnem, ngi dei ban lah pynmih na lade ïa ka bording ha ka jaka ban shaniah na kaba shu thied nabar”, la ong u Mondal.
