Shillong, Rymphang 14
Ka 4th District League T20 Cricket Tournament 2024 ba la pynlong da ka East Khasi Hills Cricket Association (EKHCA) ha ka Sngi Thohdieng ka la jam shakhmat ha kaba ka Hurdles Mawsynram bad ka Pomshutia ki la ïoh jingjop.
Ha ka jingïalehkai ba la long ha Sohra, ka Hurdles Mawsynram CC ka la pynliem ïa ka Sportopia CC da 6 wiket ha ka jingïakhun kaba nyngkong. Katba, ka Pomshutia ka la jop da 8 wiket ïa ka Lumpaia Avengers ha ka jingïalehkai kaba bud kaba la sakhi ruh ïa ka jingtbit jong u Maitshaphrang Khongjee uba la khyrwit palat ïa ka spah ron na bynta ka Pomshutia.
Ha ka jingïalehkai kaba nyngkong ka Sportopia CC ka la ïoh 141 ron haduh kaba kut jong ka 20 over bad hap 8 wiket hadien ba shimti shwa ban tied nyngkong. U Jedilbert Swer u la ïoh 32 ron na ki 28 bol bad u Sando B Rapsang u la shim 2 wiket/8 run na ki 4 over na bynta ka Hurdles Mawsynram.
Ka Hurdles Mawsyn-ram haba wan shimti ïa ka pali ba ar ka la pyndep ban kynjoh tam ïa ka thong da kaba ïoh 145 ron ha ki 17.4 over bad hap tang 4 wiket. U Macmillan Wahlang u la long uba seisoh ha ka liang kawang bol na bynta ka Sportopia da kaba shim 1 wiket/23 run na ki 4 over.
Hynrei ka namtam ka leit sha u Sandy Kharshandi uba la khyrwit 61 ron na ki 28 bol ban ïalam ïa ka Hurdles Mawsynram sha ka jingjop da 6 wiket bad ïohpdiang ruh ïa ka khusnam ‘Player of the Match’.
Ha ka jingïalehkai kaba bud, ka Lumpaia Avengers kaba la shimti shwa ban tied nyngkong ka la ïoh 141 ron haduh kaba kut jong ka 20 over bad khyllem 7 wiket. U Ibanaibor Lyngdoh u la ïoh 35 ron na ki 19 bol. U Mankhraw Ryngksai u dei ba la seisoh ha ka liang kawang bol na bynta ka Pomshutia da kaba shim 3wiket/34 run na ki 4 over.
Ka Pomshutia ka la jubab da kaba khyllem tang 2 wiket ban kynjoh sha ka thong da kaba ïoh 142 ron na ki 18 over. U Miquel Obando Nongbri u la ïoh shim 1wiket/16run na ki 3 over hynrei u khlem shym la lah ban khanglad ïa ka liang pyrshah ban poi sha ka thong.
Ka jingïaroh ka leit sha u Maitshaphrang Khongjee uba la ai mynsiem ïa ka kynhun da kaba ïoh khyrwit haduh 110 ron na ki 60 bol kaba la pynthikna ïa ka Pomshutia ban jop suk da 8 wiket. Ha kaba kut u Maitshaphrang Khongjee u la ïohpdiang ruh ïa ka khusnam ‘Player of the Match’.
